ماڭعىستاۋ وبلىسىنداعى پەرزەنتحانادا سالماعى 6 كەلى 880 گرامم بولاتىن بالا دۇنيەگە كەلدى. قازىر شاقالاقتىڭ جاعدايى بىرقالىپتى، دەپ حابارلايدى "ادىرنا" ۇلتتىق پورتالى Lada.kz رەسۋرسىنا سىلتەمە جاساپ.
دۇنيە ەسىنىن اشقان نارەستەنىڭ اناسى مۇنايلى اۋدانىنىڭ تۇرعىنى، ول ءتورتىنشى پەرزەنتىنە ءومىر سىيلاپ وتىر.
دارىگەرلەردىڭ ايتۋىنشا، انانىڭ دا، بالانىڭ دا جاعدايى جاقسى. اناسىنا كەسار تىلىگى ارقىلى وتا جاسالعان.
– تەكسەرۋ بارىسىندا بوساناتىن ايەلدىڭ بالاسى وتە ءىرى ەكەنىن تۇسىندىك. سودان اقىلداسىپ، ونى كەسار تىلىگى ارقىلى بوساندىرۋ كەرەك دەپ شەشتىك. وپەراتسيا ءساتتى اياقتالدى. مۇنداي جاعدايلار سيرەك كەزدەسەدى، ويتكەنى وسىنداي سالماقپەن سابيلەردىڭ دۇنيەگە كەلۋى - ەرەكشە قۇبىلىس، - دەپ حابارلادى وبلىستىق پەريناتالدى ورتالىقتىڭ ءباسپسوز قىزمەتى.بالا مەن انا بىرنەشە كۇن دارىگەرلەردىڭ باقىلاۋىندا بولىپ، ۇيىنە شىعارىلدى. شىققان كەزدە نارەستەنىڭ سالماعى 6 كەلى 280 گرامم بولعان. ورايى كەلگەندە ايتا كەتەيىك، ءتورت كەلىدەن اساتىن بالالار - ءىرى، ال سالماعى 5000 گرامنان اساتىن سابيلەر "الىپ بالا" سانالادى.
"ادىرنا" ۇلتتىق پورتالى
ۇقساس جاڭالىقتار
