قاڭتار وقيعاسى كەزىندە قازا تاپقان قىزدىڭ اكەسى سوت وتىرىسىنا جىبەرىلمەدى دەگەن اقپاراتقا قاتىستى باس اسكەري پروكۋراتۋرا تۇسىنىكتەمە بەردى، دەپ حابارلايدى “ادىرنا” ءتىلشىسى قاداعالاۋ ورگانىنىڭ رەسمي سايتىنا سىلتەمە جاساپ.
«وزدەرىڭىزگە بەلگىلى، الماتى گارنيزونىنىڭ اسكەري سوتى اسكەري قىزمەتشى جۇمان ا.ي.-عا ءىس ماتەريالدارىندا جاريا ەتۋگە جاتپايتىن قۇپيا قۇجاتتار بار دەگەن ايىپپەن قىلمىستىق ءىستى قاراۋدا. بۇگىن مارقۇم ايكوركەمنىڭ اكەسى ايدوس مەلدەحان باق وكىلدەرىنە سوت وتىرىسىنا جىبەرىلمەگەنىن ايتقان. مەلدەحانعا بىرنەشە رەت ۇسىنىس جاسالدى، ونىڭ ىشىندە اعىمداعى جىلدىڭ 19 شىلدەسىندە باس اسكەري پروكۋراتۋرا باسشىلىعىنىڭ قابىلداۋىندا بولعان. بىراق ازامات تىركەۋدەن جانە ارنايى تەكسەرۋدەن وتۋدەن باس تارتتى»، - دەلىنگەن حابارلامادا.
اسكەري پروكۋراتۋرا بۇعان ونىڭ قىلمىستىق ىسكە قوسا بەرىلگەن جازباشا مالىمدەمەسى دالەل ەكەنىن قوسا ايتتى.
قايعىلى وقيعا 2022 جىلدىڭ 7 قاڭتارىندا ورىن العان بولاتىن. قازاقستاننىڭ بۇرىنعى بالالار قۇقىقتارى جونىندەگى ۋاكىلى ارۋجان ساين كەشكى ساعات 19:00-دە سەيفۋللين مەن ساتباەۆ كوشەلەرىنىڭ قيىلىسىندا اپالى-سىڭلىلەر مىنگەن كولىككە وق جاۋدىرىلعانىن حابارلاعانىن ەسكە سالامىز. 4 جاسار ايكوركەم سول جەردە ءتىل تارتپاي كەتتى. ونىڭ 15 جاسار اپكەسى وق جاراقاتىمەن اۋرۋحاناعا ءتۇسىپ، امان قالعان. 4 جاسار قىزدىڭ ولىمىنە قاتىستى ءىستى الماتى گارنيزونىنىڭ اسكەري سوتى قاراۋدا.
ۇقساس جاڭالىقتار
