قاراعاندى وبلىسىندا جۇك پويىزىنىڭ استىنا ءتۇسىپ، تەمىرجول قىزمەتكەرىنىڭ قازا تابۋى بويىنشا قىلمىستىق ءىس قوزعالدى، دەپ حابارلايدى "ادىرنا".
كولىكتەگى پوليتسيا دەپارتامەنتىنىڭ مالىمەتىنشە، وقيعا 3 مامىر كۇنى بولعان. بۇل فاكتى بويىنشا قاراعاندى-سورتيروۆوچنايا ستانتسياسىندا قوزعالىس قاۋىپسىزدىگى نەمەسە تەمىرجول كولىگىن پايدالانۋ ەرەجەلەرىن بۇزۋ دەرەگى تىركەلىپ، سونىڭ سالدارىنان ابايسىزدا ادام ءولىمى ورىن العان.
اتالعان جاعدايعا بايلانىستى كولىكتەگى پوليتسيا دەپارتامەنتىنىڭ تەرگەۋ ورگاندارى قىلمىستىق ءىس قوزعاپ، ءتيىستى تەرگەۋ امالدارىن باستادى.
قازىرگى ۋاقىتتا وقيعانىڭ بارلىق ءمان-جايىن انىقتاۋ ماقساتىندا قاجەتتى تەرگەۋ ارەكەتتەرى جۇرگىزىلۋدە.
وزگە اقپارات قر قىلمىستىق-پروتسەستىك كودەكسىنىڭ 201-بابىنا سايكەس جاريا ەتىلمەيدى.
ۇقساس جاڭالىقتار
