جامبىل وبلىسىنا جۇمىس ساپارى اياسىندا قر پرەمەر-ءمينيسترى ءاليحان سمايىلوۆ تاراز قالاسىنىڭ سارقىندى سۋلاردى ءسۇزۋ الاڭدارىنىڭ جاي-كۇيىمەن جانە جاڭا كارىز-تازارتۋ قۇرىلىستارىن (كتق) سالۋعا دايىندىق بارىسىمەن تانىسىپ، سونداي-اق جاڭا وبلىستىق كوپسالالى ونكولوگيا جانە حيرۋرگيا ورتالىعىندا بولدى.
تارازدا سارقىندى سۋلاردى ءسۇزۋ الاڭدارى 1962 جىلى سالىنعان جانە بۇگىندە ابدەن توزىعى جەتكەن. ولاردىڭ جوبالىق قۋاتى – تاۋلىگىنە 43 مىڭ م3, ءىس جۇزىندە وندا كۇن سايىن شامامەن 70-80 مىڭ م3 سارقىندى سۋ جينالادى. ماسەلەنى شەشۋ ءۇشىن اكىمدىك جاڭا كارىز-تازارتۋ قۇرىلىستارىن ىسكە قوسۋ جوباسىن ازىرلەپ باستادى. قازىرگى ۋاقىتتا قاجەتتى تەحنيكالىق قۇجاتتاما دايىندالىپ جاتىر، قۇرىلىستى 2025 جىلى باستاۋ جوسپارلانىپ وتىر.
پرەمەر-مينيستر تارازدا ونەركاسىپ نىساندارىنىڭ كوبەيىپ، حالىق سانى ارتىپ كەلە جاتقانىن، الايدا قالادا ءالى كۇنگە شەشىمىن تاپپاعان كوممۋنالدىق ماسەلەلەر بار ەكەنىن اتاپ ءوتتى.
-قالادا تازارتۋ قوندىرعىلارى جوق. بۇل وزەندەر مەن جەر استى سۋلارىنىڭ لاستانۋىنا اكەلىپ سوقتىراتىن ۇلكەن پروبلەماعا اينالادى. اكىمدىك جوسپارلى قۋاتتىلىعى تاۋلىگىنە 100 مىڭ تەكشە مەتر بولاتىن جاڭا تازارتۋ قوندىرعىلارى بويىنشا ءتيىستى جۇمىستار جۇرگىزىپ جاتىر. جوبانى جۇزەگە اسىرۋعا تەزدەتىپ كىرىسۋ كەرەك، — دەدى ءاليحان سمايىلوۆ.
سونداي-اق ول «قازفوسفات» جشس پوليگونى مەن قالدىقتاردىڭ جينالۋىنا قاتىستى تۇيتكىلدى ماسەلەلەردى شەشۋ قاجەتتىگىن ايتتى.
200 ورىندىق جاڭا ونكولوگيالىق ديسپانسەردە پرەمەر-مينيسترگە زاماناۋي ساۋلەلىك تەراپياسىنا ارنالعان Elekta Versa HD مەديتسينالىق اپپاراتى ورناتىلعانى باياندالدى. اپپارات دالدىلىگىمەن ەرەكەشەلەنەدى. دارىگەرلەردىڭ ايتۋىنشا، ول كەز كەلگەن لوكاليزاتسيانىڭ جانە كەز كەلگەن كونفيگۋراتسيانىڭ ىسىكتەرىن ەمدەۋگە مۇمكىندىك بەرەدى.
بۇدان بولەك، ورتالىق باسقا دا زاماناۋي قۇرىلعىلارمەن، ونىڭ ىشىندە كومپيۋتەرلىك توموگرافيا، ماگنيتتى-رەزونانستىق توموگرافيا، تسيفرلىق مامموگرافيا، رەنتگەن اپپاراتى، ۋلترادىبىستىق اپپارات جانە ت. ب. جابدىقتالعان.
ءاليحان سمايىلوۆ وڭىردە زاماناۋي ونكولوگيالىق ورتالىقتىڭ اشىلۋى وتە قاجەتتى ءارى دۇرىس قادام بولعانىن، بۇل ونكولوگيالىق اۋرۋلارعا ەرتە دياگنوستيكا جۇرگىزۋگە جانە ولاردى ۋاقىتىلى ەمدەۋدى قامتاماسىز ەتۋگە مۇمكىندىك بەرەتىنىن باسا ايتتى.
- وڭىردە پەريناتالدىق ورتالىق پەن جاڭا اۋداندىق اۋرۋحانالارعا جانە فەلدشەرلىك-اكۋشەرلىك پۋنكتتەرگە دە قوسىمشا قاجەتتىلىك بار. دەنساۋلىق ساقتاۋ مينيسترلىگى اكىمدىكپەن بىرلەسىپ، ولاردى سالۋ ماسەلەسىن، ونىڭ ىشىندە ۇلتتىق جوبانى ىسكە اسىرۋ شەڭبەرىندە پىسىقتاۋى ءتيىس، — دەدى ول.
جەدەل، جوعارى تەحنولوگيالى مەديتسينالىق كومەك كورسەتۋ ماقساتىندا ءۇش اۋداندا ورتالىق اۋرۋحانالار سالۋ، تاعى ءۇش اۋدانداعى ورتالىق اۋرۋحانالاردى كوپبەيىندى اۋدانارالىق اۋرۋحانالار ەتىپ جاڭعىرتۋ جوسپارلانۋدا.
بيىل وبلىستا 20 دەنساۋلىق ساقتاۋ نىسانىن سالۋ جوسپارلانىپ وتىر، ونىڭ 10-ى «اۋىلدىق دەنساۋلىق ساقتاۋدى جاڭعىرتۋ» جوباسى اياسىندا جۇزەگە اسپاق. وبلىس بويىنشا مەديتسينالىق تەحنيكامەن قامتاماسىز ەتۋ 92,45 پايىزدى قۇرايدى. بەس دەنساۋلىق ساقتاۋ نىسانىنىڭ بازاسىندا العاشقى مەديتسينالىق كومەك كورسەتۋ بويىنشا وزىق تاجىريبە ورتالىقتارى اشىلدى. قازاقستان رەسپۋبليكاسى دەنساۋلىق ساقتاۋ مينيسترلىگىنىڭ بۇيرىعىمەن بۇل جوبا رەسپۋبليكا بويىنشا كەڭەيىپ جاتىر.
