بۇگىن مەملەكەت باسشىسى قاسىم-جومارت توقاەۆتىڭ جارلىعىمەن الماتىداعى "اقكەنت" ىقشام اۋدانىندا بولعان ءورت كەزىندە ادام ءومىرىن ساقتاپ قالۋعا بايلانىستى قيىن-قىستاۋ جاعدايدا كورسەتكەن ەرجۇرەكتىگى مەن جانقيارلىعى ءۇشىن ءبىر توپ ازامات ماراپاتتالدى.
ماراپاتتالعان 6 ازاماتتىڭ بارلىعى دەرلىك جاۋاپكەرشىلىگى شەكتەۋلى سەرىكتەستىكتىڭ قىزمەتكەرلەرى. ولاردىڭ ىشىندە بىردە ءبىر ءورت ءسوندىرۋشى قىزمەتكەرى بولماي شىقتى.
قاسىم-جومارت توقاەۆ "ەرلىگى ءۇشىن" مەدالىمەن مىنا ازاماتتاردى ماراپاتتادى.
1) تىلەۋجان احمەتحانوۆ – "Expo Masters" جشس مەنەدجەرى، الماتى قالاسى;
2) شيۋكريۋ گيۋناي – "سپارك ەلەكترومەحانيك" جشس ەلەكتريگى، الماتى قالاسى;
3) ەلدار يسمايلوۆ – "سپارك ەلەكترومەحانيك" جشس ەلەكترومەحانيگى، الماتى قالاسى;
4) حاليل يەردەلەن – "GASK Construction" جشس اۆتوكران وپەراتورى، الماتى قالاسى;
5) كەنان مامەدوۆ – "سپارك ەلەكترومەحانيك" جشس ەلەكترومەحانيگى، الماتى قالاسى;
6) ۆاديم رومانوۆ – "Frank-Asia" جك اۆتوكران وپەراتورى، الماتى قالاسى.
«الماتىدا ەكى باتۋت بار»
وسى رەتتە «مەملەكەت باسشىسى ءورت سوندىرۋشىلەردى نەگە ماراپاتتامادى؟» دەگەن سۇراق تۋادى. دەمەك، پرەزيدەنتتىڭ «اقكەنت» تۇرعىن ءۇي كەشەنىندەگى وقيعا بويىنشا ءورت سوندىرۋشىلەرگە كوڭىلى تولمايدى دەگەن ءسوز. سونداي-اق ءورت سوندىرۋشىلەر ادامدار جوعارى قاباتتان سەكىرگەن كەزدە نەگە باتۋت قولدانبادى؟ وسى سۇراقتى توتەنشە جاعدايلار ءمينيسترى سىرىم شارىپحانوۆقا قويعان ەدىك.
– الماتىداعى اقكەنت تۇرعىن ءۇي كەشەنىندە بولعان ورتتە نەگە باتۋت پايدالانبادى؟
– بۇل جەردە «پانيكا» بولعان سەبەپتەن ادامدار سەكىرە باستادى. بىراق تا ءبىزدىڭ قىزمەتكەرلەر كەلىپ، ادامداردى تومەن تۇسىرە باستادى. سول جەردە ادامداردى باسپالداقپەن شىعارا باستاعان كەز بولعان. ول جەردە باتۋتتاردىڭ قاجەتى بولعان جوق.
– نەگىزى وسىنداي كەزدە باتۋت بولۋ كەرەك پە؟
– ءيا، باتۋت بولۋى كەرەك. بىراق ول مىندەتتى تۇردە ەمەس، مۇنداي جاعدايدا ءورت ءسوندىرۋ ساتىلارىن پايدالانۋ كەرەك. ول جەردە ءۇش ساتى جەتكىلىكتى جانە دە قوسىمشا قۇرىلىس كومپانياسىنىڭ ەكى كرانى پايدالانىلدى.
– كوپ قاباتتى تۇرعىن ۇيدە ءورت شىققانى حابارلانعان كەزدە نەگە بىردەن باتۋت اكەلمەدى؟ الدە باتۋت مۇلدە جوق پا؟
– باتۋت بار. بيىل ەكەۋىن الدىق. بىراق وزدەرىڭىز بىلەسىزدەر الماتى وتە ۇلكەن قالا. ەكى باتۋت باسقا اۋداندا ورنالاسقان. ونى بىراق اكەلگەنشە اۆتوساتىلارىمىز قويىلىپ، ەۆاكۋاتسيا سول ارقىلى ءجۇردى.
P.S. «اقكەنت» تۇرعىن ءۇي كەشەنىندەگى ورتتەن ءبىر ايەل قازا تاۋىپ، 37 ادام اۋرۋحاناعا جەتكىزىلدى. ەگەر ءورت سوندىرۋشىلەر وزىمەن بىرگە باتۋت الىپ كەلگەندە، جوعارى قاباتتان سەكىرۋ ادامدارعا جەڭىل بولار ما ەدى، كىم ءبىلسىن؟! سوڭعى وقيعادا توتەنشە جاعدايلار مينيسترلىگىنىڭ زامان تالابىنا ساي قۇرال-جابدىقپەن جۇمىس ىستەگەنى بايقالمادى. مىسالى، ءورت كەزىندە دروندى پايدالانۋعا بولادى. الايدا سوڭعى ۇلگىدەگى قۇرال-جابدىقتى الۋعا قارجى جوق پا، جوق الدە قۇلىق جوق پا، ول جاعى كوپكە بەلگىسىز.
سەرىك جولداسباي،
«ادىرنا» ۇلتتىق پورتالى
