Búgin Memleket basshysy Qasym-Jomart Toqaevtyń Jarlyǵymen Almatydaǵy "Aqkent" yqsham aýdanynda bolǵan órt kezinde adam ómirin saqtap qalýǵa baılanysty qıyn-qystaý jaǵdaıda kórsetken erjúrektigi men janqııarlyǵy úshin bir top azamat marapattaldy.
Marapattalǵan 6 azamattyń barlyǵy derlik jaýapkershiligi shekteýli seriktestiktiń qyzmetkerleri. Olardyń ishinde birde bir órt sóndirýshi qyzmetkeri bolmaı shyqty.
Qasym-Jomart Toqaev "Erligi úshin" medalimen myna azamattardy marapattady.
1) Tileýjan Ahmethanov – "Expo Masters" JShS menedjeri, Almaty qalasy;
2) Shıýkrıý Gıýnaı – "Spark Elektromehanık" JShS elektrıgi, Almaty qalasy;
3) Eldar Ismaılov – "Spark Elektromehanık" JShS elektromehanıgi, Almaty qalasy;
4) Halıl Ierdelen – "GASK Construction" JShS avtokran operatory, Almaty qalasy;
5) Kenan Mamedov – "Spark Elektromehanık" JShS elektromehanıgi, Almaty qalasy;
6) Vadım Romanov – "Frank-Asia" JK avtokran operatory, Almaty qalasy.
«ALMATYDA EKI BATÝT BAR»
Osy rette «Memleket basshysy órt sóndirýshilerdi nege marapattamady?» degen suraq týady. Demek, prezıdenttiń «Aqkent» turǵyn úı keshenindegi oqıǵa boıynsha órt sóndirýshilerge kóńili tolmaıdy degen sóz. Sondaı-aq órt sóndirýshiler adamdar joǵary qabattan sekirgen kezde nege batýt qoldanbady? Osy suraqty Tótenshe jaǵdaılar mınıstri Syrym Sháriphanovqa qoıǵan edik.
– Almatydaǵy Aqkent turǵyn úı kesheninde bolǵan órtte nege batýt paıdalanbady?
– Bul jerde «panıka» bolǵan sebepten adamdar sekire bastady. Biraq ta bizdiń qyzmetkerler kelip, adamdardy tómen túsire bastady. Sol jerde adamdardy baspaldaqpen shyǵara bastaǵan kez bolǵan. Ol jerde batýttardyń qajeti bolǵan joq.
– Negizi osyndaı kezde batýt bolý kerek pe?
– Iá, batýt bolýy kerek. Biraq ol mindetti túrde emes, mundaı jaǵdaıda órt sóndirý satylaryn paıdalaný kerek. Ol jerde úsh saty jetkilikti jáne de qosymsha qurylys kompanııasynyń eki krany paıdalanyldy.
– Kóp qabatty turǵyn úıde órt shyqqany habarlanǵan kezde nege birden batýt ákelmedi? Álde batýt múlde joq pa?
– Batýt bar. Bıyl ekeýin aldyq. Biraq ózderińiz bilesizder Almaty óte úlken qala. Eki batýt basqa aýdanda ornalasqan. Ony biraq ákelgenshe avtosatylarymyz qoıylyp, evakýaııa sol arqyly júrdi.
P.S. «Aqkent» turǵyn úı keshenindegi órtten bir áıel qaza taýyp, 37 adam aýrýhanaǵa jetkizildi. Eger órt sóndirýshiler ózimen birge batýt alyp kelgende, joǵary qabattan sekirý adamdarǵa jeńil bolar ma edi, kim bilsin?! Sońǵy oqıǵada Tótenshe jaǵdaılar mınıstrliginiń zaman talabyna saı qural-jabdyqpen jumys istegeni baıqalmady. Mysaly, órt kezinde drondy paıdalanýǵa bolady. Alaıda sońǵy úlgidegi qural-jabdyqty alýǵa qarjy joq pa, joq álde qulyq joq pa, ol jaǵy kópke belgisiz.
Serik Joldasbaı,
«Adyrna» ulttyq portaly
