بازىلباەۆ بەسىنشى مارتە قازاقستان پرەزيدەنتى سايلاۋىنا قاتىساتىنىن مالىمدەدى

1294
Adyrna.kz Telegram

ءتورت رەت پرەزيدەنت سايلاۋىنا قاتىساتىنىن ايتىپ، بىراق ەشبىرىندە سايلاۋدىڭ سوڭىنا دەيىن بارماعان جاقسىباي بازىلباەۆ 9 ماۋسىمدا وتەتىن قازاقستاننىڭ كەزەكتەن تىس پرەزيدەنت سايلاۋىنا قاتىساتىنىن ايتتى. بۇل تۋرالى ول 19 ساۋىردە الماتىدا وتكەن ءباسپاسوز جيىنى كەزىندە مالىمدەدى.

ول سايلاۋعا "قازاقستانداعى ورىس قاۋىمداستىعى" قوعامدىق ۇيىمىنىڭ اتىنان تۇسپەك.

"قازاقستانداعى ورىس قاۋىمداستىعى" بازىلباەۆتىڭ ۇيىم اتىنان سايلاۋعا ءتۇسۋ نيەتىن "جيىن بارىسىندا بىلگەن". جيىنعا كەلگەن ۇيىم وكىلى "بۇل ءوتىنىشتى ەندى عانا ەستىگەندەرىن، ءبىر اپتا ىشىندە اقىلداسىپ، شەشىم قابىلدايتىندارىن" ايتتى.

جيىن كەزىندە بازىلباەۆ سايلاۋالدى باعدارلاماسىمەن تانىستىردى.

- قورعانىس قابىلەتىن نىعاتۋدان باستايمىن. ەۋروپا وداعى مەن شانحاي ىنتىماقتاستىق ۇيىمىن قولدايمىن. ەۋرازيالىق وداق اياسىندا رەسەيگە قورعانىس كواليتسياسىن قۇرۋدى ۇسىنامىن، - دەدى ول.

بازىلباەۆتىڭ ەكى بەتتىك سايلاۋالدى باعدارلاماسىندا زەينەتكەرلەردى كوممۋنالدىق تولەمنەن بوساتۋ، كوپ بالالى انالارعا تەگىن باسپانا بەرۋ، وقۋ مەن مەديتسينانى تولىقتاي تەگىن ەتۋ مەن ءار قالادا زاۋىت-فابريكا سالۋ جوسپارى بارى جازىلعان.

1998 جىلعى پرەزيدەنت سايلاۋىندا بازىلباەۆ باسەكەلەسى نۇرسۇلتان نازارباەۆتىڭ پايداسىنا سايلاۋدان شىعاتىنىن مالىمدەگەن. ازاتتىقتىڭ "وسى جولى سايلاۋدا الدەبىر كانديداتتىڭ پايداسى ءۇشىن سايلاۋدان شىعىپ قالمايسىز با؟" دەگەن سۇراعىنا بازىلباەۆ "شىقپايمىن" دەپ جاۋاپ بەردى.

- شىقپايمىن. زاڭدا قوزعالىس نە پارتيا اتىنان تۇسسەڭ، سەن شەشپەيسىڭ، سەنى كىم، قاي پارتيا تۇسىرەدى – سولار شەشەدى. سول سەبەپتى مەنى ۇسىنسا، مەن تۇسەمىن، تاۋەكەل، - دەپ جاۋاپ بەردى.

67 جاستاعى جاقسىباي بازىلباەۆ بۇعان دەيىن ءتورت رەت – 1998, 2005, 2011 جانە 2015 جىلدارى وتكەن قازاقستان پرەزيدەنتى سايلاۋلارىنا ءوزىن-ءوزى ۇسىنعانىمەن، ساياسي باسەكەنىڭ سوڭعى كەزەڭىنە جەتپەي، ءوز ەركىمەن شىعىپ كەتكەن.

پىكىرلەر