استاناداعى قىلمىستىق ىستەر جونىندەگى مامانداندىرىلعان اۋداندىق سوتىندا بىرنەشە اپتادان بەرى كەنتاۋ قالاسىنىڭ ەكس-اكىمى راشيد ايۋپوۆتىڭ سوتى بولىپ جاتىر. بۇرىنعى اكىمگە كاسىپكەردەن 2,8 ميلليون دوللار پارا الدى دەگەن ايىپ تاعىلىپ وتىر، دەپ حابارلايدى "ادىرنا" ۇلتتىق پورتالى.
ەسكە سالا كەتەيىك، راشيد ايۋپوۆ 2022 جىلى كەنتاۋ قالاسىنىڭ اكىمى بولىپ تاعايىندالدى. سول جىلدىڭ قازان ايىندا ۇستالدى. ول Alageum Group كومپانياسىنىڭ يەسى – بەلگىلى كاسىپكەر سايدۋللا قوجاباەۆتان 2,8 ملن تەڭگە پارا الدى دەگەن كۇدىككە ءىلىندى. الدىن الا ايتىلعان اقپاراتقا قاراعاندا مۇنداي قاراجات ءۇشىن ايۋپوۆ تەندەر ۇتتىرىپ بەرۋگە ۋادە ەتكەن.
كاسىپكەردىڭ ايتۋىنشا، ەكەۋى 2013 جىلى تانىسىپتى. ولاردى كەنتاۋ ترانسفورماتور زاۋىتىندا جۇمىس ىستەگەن ورتاق تانىس باعلان نۇرگەلديەۆ تانىستىرعان.
تەرگەۋ حاتتاماسىندا كورسەتىلگەندەي، اسا ءىرى كولەمدە پارا العان راشيد ايۋپوۆ سول اقشاعا الدىمەن Toyota Land Cruiser Prado جول تالعامايتىن اۆتوكولىگىن (13,4 ملن تەڭگە), استاناداعى BI Village كوتتەدج قالاشىعىنان ءۇي (90 ملن تەڭگە) ساتىپ الىپ، تۋىسىنىڭ اتىنا جازدىرىپ قويعان. سونداي-اق، بىرنەشە جۇك كولىگىن دە ساتىپ الىپتى.
بۇل قىلمىستىق ىستە شىمكەنت قالاسىنىڭ ەكس-اكىمى عابيدوللا ءابدىراحىموۆتىڭ دە ەسىمى ءجيى ايتىلادى. ول اكىم بولعان كەزدە ايۋپوۆ اكىمدىكتىڭ اپپاراتىن باسقاردى. ەكەۋى دە «بولاشاق» باعدارلاماسىنىڭ تۇلەگى. ال، ارىز جازعان كاسىپكەر وسىناۋ ءىرى سومانى عابيدوللا ءابدىراحىموۆتىڭ كومەكشىسىنە بەرگەنىن ايتادى.
«اقشا تولى سومكەنى وسىدان ون جىل بۇرىن كاسىپكەر سايدۋللا قوجاباەۆتىڭ ۇلى ەركەبۇلان يلياسوۆ پەن باعلان نۇرگەلديەۆ عابيدوللا ءابدىراحىموۆتىڭ كومەكشىسى يساميدين قانتورەەۆكە اكەلىپ بەرگەن»، – دەلىنگەن تەرگەۋ ماتەريالىندا.
سوت وتىرىسىندا كاسىپكەردىڭ ۇلى ەركەبۇلان يلياسوۆ پەن راشيد ايۋپوۆتىڭ اڭگىمەسىنىڭ اۋديوجازباسى تىڭدالدى. وندا ەكس-اكىم 2,8 ميلليون دوللاردان تەك 100 مىڭ دوللار العانىن انىق ايتقان. اڭگىمە بارىسىندا ول ارىز بەن كۋاگەر سوزىنەن ءوزىن جانە باعلان نۇرگەلديەۆتى الىپ تاستاۋدى بىرنەشە رەت سۇرايدى. ەسەسىنە عابيدوللا ابدىراحىموۆقا قاتىستى كومپرومات بەرۋدى ۇسىنادى. ونىڭ سوزىنشە، ءابدىراحىموۆتىڭ دە «ارتى تازا ەمەس»، ونىڭ زاڭسىز العان نىساندارى مەن فيرمالارى بار كورىنەدى.
«مىنە، قارا، شىنىمدى ايتامىن، مەن تەك 100 مىڭ دوللار عانا الدىم، مەن ول اقشانى ورنىنا قويامىن. ءابدىراحىموۆتى وتىرعىزۋ وڭاي، ول ءۇشىن بىراق مەنى جانە باعلاندى بۇل ىستەن الىپ تاستاڭدار»، – دەيدى راشيد ايۋپوۆ كاسىپكەردىڭ ۇلىنا.
سوتقا قاتىسقان ەركەبۇلان يلياسوۆ دا توسىن پىكىر ءبىلدىردى. ول ايۋپوۆ تاراپىنان ابدىراحىموۆقا قاتىستى ءتورت رەت ۇسىنىس تۇسكەنىن ايتتى. دەگەنمەن، سوتتالۋشىنىڭ ءوزى بولسا بۇل سوزدەردى ايتپاعانىن، ابدىراحىموۆقا قارسى كۋالىك بەرمەيتىنىن مالىمدەپ وتىر.
"ادىرنا" ۇلتتىق پورتالى
