ء"بىر اۋىل-ءبىر ءونىم" جوباسىنا قاتىسۋشىلار "قورعاس" حالىقارالىق شەكارا ماڭى ىنتىماقتاستىعى ورتالىعىنىڭ قىتاي بولىگىندە وتكەن I ىلە حالىقارالىق اۋىل شارۋاشىلىعى ونىمدەرىنىڭ كورمەسىنە قاتىستى.
ءىس-شارانىڭ نەگىزگى ماقساتى تۋريزم يندۋسترياسىن، حالىقارالىق جانە ساۋدا ىنتىماقتاستىعىن دامىتۋ بولدى. ال ءۇش كۇندىك جارمەڭكە اياسىندا قىتايلىق تۋريستەر جەتىسۋ وبلىسى وندىرۋشىلەرىنىڭ ونىمدەرىنىڭ كەڭ اسسورتيمەنتىنە ءوز باعالارىن بەردى.
كورمەگە كەلۋشىلەردىڭ نازارىنا تابيعي ورگانيكالىق بال، نان ونىمدەرى، ەكوونىمدەر، ءسۇت ونىمدەرى، شۇجىق ونىمدەرى، توقىما جانە كيىز بۇيىمدارى، ساۋمالدان، سۇتتەن، مايدان، بالدان جاسالعان سابىندار، سازدان، گيپستەن جاسالعان بۇيىمدار جانە تاعى باسقالار ۇسىنىلدى.
قازاقستاندىق قوناقتار ءۇشىن ىلە-قازاق اۆتونوميالىق وبلىسىنىڭ قارقىندى دامىپ كەلە جاتقان 29 اۋدانىنان اگروونەركاسىپتىك كەشەننىڭ وندىرىستىك وبەكتىلەرىنىڭ اۋىل شارۋاشىلىعى سالاسىنىڭ جەتىستىكتەرى كورسەتىلدى، ينۆەستيتسيالار تارتۋ بويىنشا پرەزەنتاتسيا جانە قازاقستان مەن قىتاي اراسىنداعى اۋىل شارۋاشىلىعى جانە عىلىمي-تەحنيكالىق ىنتىماقتاستىق جونىندەگى فورۋم ۇيىمداستىرىلدى.
كورمە اياسىندا قاتىسۋشىلاردى التىن جانە كۇمىس حالىقارالىق سەرتيفيكاتتارمەن ماراپاتتاۋ ءراسىمى ءوتتى. ايتا كەتۋ كەرەك، ماراپاتتالعان 12 كاسىپكەردىڭ 9-ى ء"بىر اۋىل-ءبىر ءونىم" جوباسىنا قاتىسىپ، جوعارىدا اتالعان ماراپاتتارعا يە بولدى.
جوبا فيناليستەرىنىڭ ءبىرى، كۇمىس سەرتيفيكات يەگەرى الماگۇل مۇراتبەك ءوز ەموتسيالارىمەن جانە اسەرلەرىمەن ءبولىستى.
"مەن "Qonaq Kade" برەندىنىڭ نەگىزىن قالاۋشىمىن، جەمىستەردەن تابيعي پاستيلا جاساۋمەن اينالىسامىن، ءوز ونىمدەرىمدى كورمەگە اكەلدىم. ءبىرىنشى كەزەكتە، مەن جەتىسۋ وبلىسىنىڭ كاسىپكەرلەر پالاتاسى جانىنداعى ايەلدەر كاسىپكەرلىگىن دامىتۋ ورتالىعىنا كونسۋلتاتسيا مەن قولداۋ سۇرادىم، وندا مەن بارلىق قاجەتتى كومەكتى الدىم، ال ودان ءارى وتەۋسىز گرانت ۇتىپ الىپ، جەر ۋچاسكەسىن الدىم. مەن كورمەلەرگە ۇنەمى قاتىسامىن، ەندى مەن قحر-داعى حالىقارالىق كورمەگە دە كەلدىم، بۇعان وتە قۋانىشتىمىن. كورمە اياسىندا مەن قىتاي تاراپىمەن ىنتىماقتاستىق تۋرالى ۇسىنىستار الدىم", - دەيدى الماگۇل مۇراتبەك.
ايتا كەتەيىك، اۋىل شارۋاشىلىعى ونىمدەرىنىڭ كورمەسىن، دەمونستراتسيالارىن جانە تۇساۋكەسەرلەرىن وتكىزۋدىڭ وسىنداي فورماتىنىڭ ارقاسىندا ىسكەرلىك كەلىسسوزدەر مەن تاجىريبە الماسۋ ءوتتى، بۇل قازاقستان-قىتاي قاتىناستارىن ىنتىماقتاستىقتىڭ جاڭا دەڭگەيىنە كوتەرەدى، سونداي-اق ساۋدا قاتىناستارىن دامىتۋ كوكجيەگىن كەڭەيتەدى.
"كورمەنىڭ ارقاسىندا ءبىزدىڭ قاتىسۋشىلار حالىقارالىق نارىقتا ۇلكەن تاجىريبە جينادى، قىتاي تاراپىنان الەۋەتتى ساتىپ الۋشىلار پايدا بولدى. ءبىزدىڭ كاسىپكەرلەر شانحاي كورمەسىنە، سونداي-اق جاپوندارمەن جۇمىس ىستەۋگە ۇسىنىس الدى. الداعى ۋاقىتتا بيزنەس-قاۋىمداستىقتار ون تونناعا جۋىق ءونىم ساتۋدى جوسپارلاپ وتىر. وتكەن كورمەدە ءبىزدىڭ قاتىسۋشىلار ءوز ونىمدەرىنىڭ بارلىعىن دەرلىك ساتا الدى", – دەپ قورىتىندىلادى وبلىس بويىنشا" ءبىر اۋىل-ءبىر ءونىم " جوباسىنىڭ جەتەكشىسى جەتىسۋ اراي يساعۇلوۆا.
