«اتامەكەن» ۇكپ توراعاسى رايىمبەك باتالوۆ جەتىسۋ وبلىسىنا ءىس-ساپارى كەزىندە الاكول اۋدانىنا باردى. وندا «الاكول-اگرو» جشس قىزمەتىنە ەرەكشە قىزىعۋشىلىق تانىتتى.
جەتىسۋ وبلىسى – ونەركاسىپ ءوندىرىس، اوك دامىتۋعا قولايلى جاعدايى بار ستراتەگيالىق ماڭىزدى ءوڭىر. جەتىسۋ ءتۋريزمدى دامىتۋ ءۇشىن جەتكىلىكتى تابيعي رەسۋرستارى بار ولكە، مال شارۋاشىلىعىن دامىتۋعا سۋى مەن جەم-ءشوبى مول ايماق.
اۋىل شارۋاشىلىعىنداعى تابىس تۋرالى ايتساق، «الاكول-اگرو» كاسىپورنىننىڭ جەتىستىگىن اتاپ وتكەن ءجون. رايىمبەك باتالوۆ، ۇكپ توراعاسىنىڭ ورىنباسارى ەربول ەسەنەەۆ، ەت-ماي باعىتىنداعى رەسپۋبليكالىق قوي شارۋاشىلىعى پالاتاسىنىڭ باسشىسى نۇرجان جۋماديللاەۆ، جەتىسۋ وبلىسى كاسىپكەرلەر پالاتاسىنىڭ توراعاسى داۋرەن وڭالباەۆ، باتىس قازاقستان وبلىسىنىڭ «بىرلىك» جشس باسشىسى سەرعازى يسەمباەۆ كاسىپورىنداعى وندىرىسپەن تانىستى.
«الاكول-اگرو» – مال شارۋاشىلىعى سالاسىنداعى تابىستى دامىپ كەلە جاتقان كاسىپورىنداردىڭ ءبىرى، وندا شامامەن 45 مىڭ باس قوي-ەشكى بار. اتاپ ايتقاندا، 28 مىڭعا جۋىق انالىق باس ءوسىرىلىپ جاتىر. سونداي-اق 580-گە جۋىق تۇيە دە بار. فەرمادا قويدىڭ بىرنەشە تۇقىمى وسىرىلەدى. قوڭىر جانە قارا قوشقار، اققاراباس قوشقارى، قازاقتىڭ ءىرى قارا ءجۇندى تۇقىمىمەن شاعىلىسقان – ەدىلباي، بليۋتەكسەل، تەكسەل تۇقىمىمەن شاعىلىسقان – كاتادين، وڭتۇستىك قازاقستان مەرينوسىمەن شاعىلىسقان – دورپەر، تازا دورپەر تۇقىمدى ءتولدى وسىندا تابۋعا بولادى.
كەزدەسۋدە جەتىسۋ ولكەسىنىڭ قوي وسىرۋشىلەرى ۇلتتىق پالاتا باسشىسىنا قوي وسىرۋدە قولدانىلاتىن زاماناۋي تەحنولوگيالار تۋرالى ايتتى. ءتيمىدى تەحنووگيالار قويشىلارعا وندىرىستە تيىمدىلىككە قول جەتكىزۋگە جانە ەتتىڭ جوعارى ساپاسىن قامتاماسىز ەتۋگە مۇمكىندىك بەرەدى. سونداي-اق، وڭىردە قويدىڭ اسىل تۇقىمدى جانە ءونىمدى قاسيەتتەرىن جەتىلدىرۋ بويىنشا سەلەكتسيالىق جۇمىس دەڭگەيىن ارتتىرۋ ماقساتىندا عىلىممەن تىعىز ىنتىماقتاستىقتا بارىن اتاپ ءوتتى.
«قازاقستاننىڭ تاۋەلسىزدىگى كەزەڭىندە قوي شارۋاشىلىعى 14 ملن باستى جوعالتتى. ەگەر 1990 جىلى قازاقستاندا قوي مەن ەشكىنىڭ سانى شامامەن 35 ملن باستى قۇراسا، بيىل مال باسى شامامەن 21 ملن باستى قۇرادى»، – دەدى «الاكول اگرو» جشس باسشىسى سكەندير تورەحانوۆ.
كومپانيا باسشىسىنىڭ ايتۋىنشا، بۇگىندە ءىرى بيزنەس قوي شارۋاشىلىعىنا قاراجات سالۋعا مۇددەلى. «ءبىزدىڭ كومپانيا ءۇشىن قوي شارۋاشىلىعى – جاڭا باعىت، بىراق قازىردىڭ وزىندە ءبىز سالانى ۇزاق مەرزىمدى پەرسپەكتيۆادا تۇراقتى تابىس كوزى رەتىندە قاراستىرامىز»، – دەدى ول.
سونىمەن قاتار رايىمبەك باتالوۆ الاكول اۋدانىنا ساراپىندا جايلاۋدا جاس مال وتارىن جاساقتاۋ ءۇشىن ارنايى اپپارات ارقىلى قوزى-لاقتاردى ەنەسىنەن اجىراتۋ پروتسەسىنە قاتىستى. جاڭا وتار قالىپتاستىرۋ – قوزىلاردى ەنەسىنەن اجىراتۋ بويىنشا جىل سايىن وتەتىن ەكونوميكالىق شارا. بۇعان دەيىن كۇنىنەن 1 مىڭ قوزىنۋ اجىراتۋ مۇمكىن بولسا، قازىر اپپاراتتىڭ كومەگىمەن ولاردىڭ سانىن ءتورت مىڭعا دەيىن كوبەيتۋگە بولادى.
ۇلتتىق پالاتا توراعاسى كومپانيانىڭ رەسپۋبليكا ەكونوميكاسىن دامىتۋداعى تاجىريبەسىن اتاپ ءوتىپ، وڭىرلىك ەرەكشەلىكتەردى ەسكەرە وتىرىپ، اۋىل شارۋاشىلىعىن دامىتۋ قاجەتتىگىن اتاپ ءوتتى.
«جالپى، سالالاردى دامىتۋ كەشەندى تۇردە جۇرگىزىلۋى ءتيىس. ءوندىرىس پروتسەسىنىڭ ءوزى، قارجىمەن قامتاماسىز ەتۋ، مامان دايىنداۋ جانە تەحنيكامەن جابدىقتاۋ، تيىمدىلىكتى ارتتىرۋ ءۇشىن بەلگىلى ءبىر جاعدايلار جاساۋ قاجەت. بۇل رەتتە مەملەكەت جاڭا ەكسپورتتىق نارىقتاردى اشۋ، تۇراقتى مەملەكەتتىك ساياسات ماسەلەلەرىن ءوز موينىنا الۋى ءتيىس. ءبىز ءوز كەزەگىندە بيزنەسكە وڭتايلى جانە ءتيىمدى شەشىمدەر دايىنداۋعا جانە ۇسىنۋعا دايىنبىز. ءار وڭىردە ءوز ليدەرلەرى بار، ولاردىڭ تاجىريبەسىن كوبەيتۋىمىز كەرەك»، – دەپ قورىتىندىلادى رايىمبەك باتالوۆ.
