«ءبىر اۋىل – ءبىر ءونىم» جوباسى فيناليستەرىنىڭ ءبىرى – جەتىسۋلىق نۇرجانەت ەرداۋلەت ءۇي شارۋاشىلىعىندا شەبەرحانا ۇيىمداستىردى. ول ساۋمال، قىمىز، ايران، بال، جانۋار مايىنان اتا-بابا ءادىسى بويىنشا سابىن شىعارادى، دەپ حابارلايدى قازاقپارات ءتىلشىسى.
ونىڭ ايتۋىنشا، سابىن - ءوزىنىڭ قاسيەتتەرىمەن ەرەكشە، بۇل كوسمەتيكانىڭ ءبىر ءتۇرى. ايەل ءوز تاۋارىن جەتىسۋ وبلىسىنىڭ ايەلدەر كاسىپكەرلىگىن دامىتۋ ورتالىعىنىڭ ارقاسىندا ساتتى.
«سابىن جاساۋدىڭ ەجەلگى ءادىسىن اجەمنەن ۇيرەندىم. ءبىز قىتايدان قازاقستانعا كوشكەن كەزدە بۇل ءادىستى زاماناۋي تۇردە جانداندىرۋدى شەشتىم. سابىنعا حوش ءيىس، ءتۇس بەرىپ، ءپىشىندى تاڭدادىم»، - دەيدى ول.
جەتىسۋ وبلىسى كاسىپكەرلەر پالاتاسىنىڭ توراعاسى داۋرەن وڭالباەۆتىڭ ايتۋىنشا، كاسىپكەر كەڭەس الۋ ءۇشىن وتكەن جىلى پالاتاعا جۇگىنگەن. كاسىپكەرلىكتى دامىتۋ ورتالىعىندا وعان قاجەتتى كومەك پەن قولداۋ كورسەتىلگەن. قازىرگى ۋاقىتتا كاسىپكەر اقسۋ اۋدانىندا ءىس باستاپ، كوسمەتيكالىق سابىن شىعارۋمەن شۇعىلدانادى. بيىل ول «قورعاس» شىحو حالىقارالىق كورمەسىنە قاتىسپاق.
«سابىن تەك ءبىزدىڭ ەلدە عانا ەمەس، ەلدەن تىس جەرلەردە دە سۇرانىسقا يە. ونىمدەرىم بىردەن ساتىلىمعا شىعىپ، ەندى قىتاي حالىق رەسپۋبليكاسىنان دا تاپسىرىستار كەلىپ ءتۇسىپ جاتىر»، - دەيدى نۇرجانەت ەرداۋلەت.
ەندى كاسىپكەر بيزنەستى كەڭەيتۋدى جوسپارلاپ وتىر، بۇل جەرگىلىكتى تۇرعىنداردى جۇمىسپەن قامتۋعا مۇمكىندىك بەرەدى.
ايتا كەتەيىك، ء"بىر اۋىل – ءبىر ءونىم" جوباسىنا قاتىسۋشىلاردىڭ ۇشەۋى جەڭىمپاز بولادى، ال بولاشاقتا ونىمەن بىرگە ولاردىڭ ونىمدەرىن جىلجىتۋ بويىنشا جۇمىستار جۇرگىزىلەدى، كونسۋلتاتسيالىق سۇيەمەلدەۋ، رەسپۋبليكالىق دەڭگەيدە ناسيحاتتاۋ جۇزەگە اسىرىلادى.
