اقش سوتى مۇحتار ءابليازوۆتىڭ بتا بانكتەن اقشا جىمقىرعانىن انىقتادى، دەپ حابارلايدى «ادىرنا» ءتىلشىسى.
نيۋ-يوركتىڭ وڭتۇستىك وكرۋگى بويىنشا اقش اۋداندىق سوتى دجون گ. كوەلتل Triadou SPV S. A-عا قارسى شاعىمعا وراي «بتا بانكى» اق پايداسىنا 193 ملن دوللاردان استام سوماعا شەشىم شىعاردى.
سوت شەشىمى القابيلەردىڭ 2022 جىلعى جەلتوقسانداعى ۇكىمىنەن كەيىن شىققانى، وعان سايكەس Triadou قارجى جىمقىرعانى جانە زاڭسىز بايۋى ءۇشىن جاۋاپقا تارتىلعانى اتاپ ءوتىلدى.
«سوت بتا-نىڭ Triadou-عا قاتىستى سەنىمگەرلىك مەنشىككە جانە بتا قاراجاتىن پايدالانۋ ارقىلى الىنعان كەز كەلگەن پايداعا قاتىستى تالابىن قاناعاتتاندىردى. سونداي-اق بتا-نىڭ Triadou-دىڭ بىرقاتار اۆتيۆىنە قاتىستى تالاپ ارىزىن قابىلدادى»،— دەلىنگەن حابارلامادا.
سوت جاۋاپكەر Triadou SPV - ءابليازوۆتىڭ كۇيەۋ بالاسى يلياس حراپۋنوۆ قۇرعان جانە باقىلايتىن جالعان كومپانيا ەكەندىگىن راستادى. كومپانيا بتا-دان ۇرلانعان قاراجات تۇرىندە 70 ميلليوننان استام اقش دوللارىن الىپ، ونى نيۋ-يوركتەگى جانە امەريكا قۇراما شتاتتارىنىڭ باسقا جەرلەرىندەگى جىلجىمايتىن مۇلىككە ينۆەستيتسيا رەتىندە سالعان.
«سوتتا ۇسىنىلعان دالەلدەر اقش-تاعى Triadou اتىنان ينۆەستيتسيالانعان قاراجات ءابىليازوۆتىڭ باسقا فرونتتىق كومپانيا ارقىلى بتا-دان ۇرلاعان 115,3 ميلليون دوللارعا تىكەلەي قاتىسى بار ەكەنىن كورسەتەدى»،—دەلىندى سوت قورىتىندىسىندا.
