جەتىسايلىق ايەل وگەي قىزدارىن قالاي ازاپتاعانىن داپتەرگە جازىپ وتىرعان

28 جاستاعى جەتىسايلىق ايەلدىڭ وگەي قىزدارىن ازاپتاۋ تاسىلدەرىن داپتەرگە جازىپ وتىرعانى بەلگىلى بولدى.

ءدال قازىرگى ۋاقىتتا ءۇش ءجاسوسپىرىم اۋرۋحانادا جاتىر. قاتتى پسيحولوگيالىق قىسىمعا ۇشىراعان قىزدار ۇرەيلەنىپ قالعان. كورگەن قورلىقتارىن اشىپ ايتۋعا دا قورقادى، دەپ جازادى otyrar.kz

وگەي شەشە ارنايى داپتەرگە قىزداردى قالاي ازاپتاعانىن جازىپ وتىرعان. ول قىزداردى قىسقىش، پىشاق، وقتاۋ، ينەمەن قيناعان. ال شايلەرىنە ىدىس جۋاتىن گەل قوسىپ بەرەدى ەكەن. اياقتارىن ىستىق سۋعا مالعان. "اكەلەرىڭ كەلگەندە كۇلىپ تۇرىڭدار" دەگەن قاتاڭ تاپسىرماسى دا بولىپتى.

تۋىستارىنىڭ ايتۋىنشا، قىزداردىڭ تۋعان اناسى بەس جىل بۇرىن وتباسىنان كەتىپ قالعان، سودان بەرى بالالارىن ىزدەپ كەلمەگەن. وتاعاسى ەكىنشى ايەلىمەن ءۇش جىلدان بەرى تۇرىپ جاتىر.

مۇنداي ازاپقا قىزدار "اكەمىز تاعى دا اۋىرىپ قالماسا ەكەن" دەگەن نيەتپەن ءتوزىپ ءجۇرىپتى. اكەلەرى قىزداردىڭ اناسىمەن اجىراسقاندا ينسۋلت الىپ، قاتتى اۋىرعان ەكەن. اكەلەرىنىڭ قينالعانىن كورگەن قىزدار تاعى دا وسى جاعدايدىڭ قايتالانباۋى ءۇشىن ءتوزىپ باققان. ادامعا ءتان ەمەس ايۋان ارەكەتكە بارعان وگەي شەشە قىزداردى "تۇرمەگە تۇسسەم دە، قايتىپ كەلگەن سوڭ ەستەرىڭنەن كەتپەيتىندەي ەتىپ، كەك الامىن" دەپ قورقىتادى ەكەن.

وگەي انانىڭ نە ءۇشىن مۇنداي قورلىق كورسەتكەنى جۇمباق كۇيىندە قالىپ تۇر. قاماۋعا الىنعان ونىڭ 1 جاس 7 ايلىق ۇلى بار. ودان بولەك، ەكىنشى بالاعا جۇكتى ەكەن. ءوزى انا بولا تۇرا، وگەي قىزدارىنا كۇن كورسەتپەگەن ونىڭ بۇل قىلىعىن تۋىستارى دا تۇسىنە الماي الەك. ابدەن اشىنعان قىزداردىڭ تۋىستارى "وگەي شەشە قاتاڭ جازاسىن السىن" دەپ وتىر.

پوليتسيانىڭ حابارلاۋىنشا، بۇل فاكتى بويىنشا تەرگەۋ امالدارى جۇرگىزىلىپ جاتىر. كۇدىكتى ايەل قاماۋعا الىندى.