قورعانىس ءمينيسترى دابىل قاقتى: قازاقستاننىڭ سەگىز مىڭ اسكەرى كوتەرىلدى

701

"ايبالتا – 2019" وقۋ-جاتتىعۋى وسى جىلدىڭ 3 مامىرىنا دەيىن جالعاسادى

قازاقستان قورعانىس ءمينيسترى گەنەرال-مايور نۇرلان ەرمەكباەۆتىڭ بۇيرىعىمەن قارۋلى كۇشتەردىڭ قۇرامالارى مەن اسكەري بولىمدەرى "ايبالتا – 2019" ءىرى اۋقىمدى ستراتەگيالىق كوماندالىق-شتابتىق وقۋ-جاتتىعۋىن وتكىزۋ اياسىندا وقۋ دابىلى بويىنشا كوتەرىلدى.

قازاقستان قارۋلى كۇشتەرىنىڭ جاتتىعۋلارى

وقۋ-جاتتىعۋدىڭ نەگىزگى ماقساتى – اسكەري باسقارۋ ورگاندارىنىڭ ۇيلەسىمدىلىگىن جەتىلدىرۋ، اسكەرلەردىڭ دالالىق ماشىعىن ارتتىرۋ جانە اسكەرلەردىڭ باسقارۋدا شتابتار مەن كومانديرلەردىڭ تۇراقتى پراكتيكالىق داعدىلارىن شىڭداۋ بولىپ تابىلادى.وقۋ-جاتتىعۋدىڭ مانەۆرىنە شامامەن 8000 اسكەري قىزمەتشى جانە 2000-نان اسا بىرلىك قارۋ-جاراق پەن اسكەري تەحنيكا، مايداندىق جانە ارميالىق اۆياتسيا تارتىلدى.

"وقۋ-جاتتىعۋعا قۇرلىق اسكرەلەرى، اۋە قورعانىسى كۇشتەرى، ارنايى وپەراتسيالار كۇشتەرى، ارنايى اسكەرلەر مەن ماتەريالدىق-تەحنيكالىق قامتاماسىز ەتۋ بولىمدەرى مەن بولىمشەلەرى تارتىلدى", - دەپ جازىلعان قورعانىس مينيسترلىگى تاراتقان حابارلامادا.

اسكەرلەردىڭ تەمىرجول كولىگىمەن قوزعالۋى ءۇش باعىت بويىنشا جۇزەگە اسىرىلدى. وعان 20-دان اسا اسكەري ەشەلون تارتىلدى. 8 لەك قۇرامىندا ءاۆتوموبيلدى كولىكپەن 400-دەن اسا بىرلىك اسكەري تەحنيكا مارش جاسادى. قوزعالىستىڭ ۇزىندىعى 300-دەن باستاپ 1000 شاقىرىمنان اسادى.

"ايبالتا – 2019" ستراتەگيالىق كوماندالىق-شتابتىق وقۋ-جاتتىعۋى الماتى وبلىسىنىڭ "كوكتال" وقۋ-جاتتىعۋ پوليگونىندا وتكىزىلىپ جاتىر، وسى جىلدىڭ 3 مامىرىنا دەيىن جالعاسادى.

Sputnik.

پىكىرلەر
رەداكتسيا تاڭداۋى