استانادا اۆتوبۋس جۇرگىزۋشىسى تۋرا كولىك تىزگىنىندە كوز جۇمدى. كۋاگەرلەردىڭ ايتۋىنشا، 62 جاستاعى ازامات كەنەتتەن ەسىنەن تانىپ، رولگە يە بولا الماي قالعان. بۇل تۋرالى كتك تەلەارناسى جاريالادى، دەپ حابارلايدى “ادىرنا” ۇلتتىق پورتالى.
2023 جىلدىڭ 27 شىلدەسىندە ساعات 10.37 شاماسىندا IVECO ماركالى مارشرۋتتىق اۆتوبۋستى باسقارعان 1961 جىلى تۋعان جۇرگىزۋشى، اۋەزوۆ كوشەسىنە قاراي بوگەنباي باتىر داڭعىلىمەن بەيبىتشىلىك كوشەسى جاعىنان كەلە جاتىپ، رۋلگە يە بولا الماي ۇيگە قاراماقارسى تۇرعان جاياۋ جۇرگىنشىلەرگە ارنالعان جول بەلگىسىمەن قورشاۋعا سوقتىعىسقان، - دەيدى استانا قالاسى پد رەسمي وكىلى نۇرالى تاڭىربەرگەنوۆ.
ابىروي بولعاندا جولاۋشىلار اراسىندا زارداپ شەكككەندەر جوق. ال وقيعا ورنىنا جەدەل جاردەم دەرەۋ جەتكەنىمەن، جۇرگىزۋشى اۋرۋحاناعا جەتپەستەن، اۆتوبۋس ىشىندە ءتىل تارتپاي كەتتى. دارىگەرلەر ءولىمنىڭ نەگىزگى سەبەبى - جۇرەك تالماسى بولۋى مۇمكىن دەپ وتىر. مارقۇمنىڭ جولاۋشىلار اۆتوبۋسىن تىزگىندەگىنىنە 15 جىلدان استام ۋاقىت بولعان. جاۋاپتى كومپانيانىڭ ايتۋىنشا، جۇرگىزۋشى ەكى كۇندىك دەمالىسىنان بۇگىن عانا شىعىپتى. تاڭعى ۋاقىتتا مەديتسينالىق تەكسەرۋدەن وتكەندە دەنساۋلىعىندا ەش كىنارات بولماعان.
