ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى جەدەل ءىس-شارالار بارىسىندا قالا اۋماعىندا پسيحوتروپتىق زاتتار قويىپ كەتۋمەن اينالىسقان ايەلدى ۇستادى. بۇل تۋرالى Polisia.kz مالىمدەدى، دەپ حابارلايدى “ادىرنا” ۇلتتىق پورتالى.
“جۇمىسقا” شىققان اۆتولەدي پوليتسەيلەردى بايقاپ، ەسىرتكى ورامىنان تەزىرەك قۇتىلۋ ءۇشىن، ونى جولدىڭ شەتىندە تۇرعان ءوز كولىگىنىڭ استىنا لاقتىرىپ جىبەرگەن. جەدەل قىزمەتكەرلەر بۋمانىڭ ىشىنەن ءبىر رەتتىك 20 دوزا “سينتەتيكا” تاپتى.
ۇستالعان ايەل كولىگىنىڭ سالونىن تەكسەرۋ كەزىندە تاعى ءبىر شاعىن ورام گاشيش تاركىلەندى. بۇعان قوسا، وڭ جاق ەدەن كىلەمشەسىنىڭ استىنان قۇپيا ورىنداردى قازۋعا ارنالعان پىشاق تابىلدى، دەلىنگەن حابارلامادا.
تەرگەۋشىلەر بۇل جايتتى قك-ءتىڭ 297-بابى (ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ) بويىنشا تىركەدى. ونىڭ جاقىندا عانا مەديتسينا سالاسىنداعى قىزمەتىنەن كەتكەندىگى بەلگىلى بولدى.
اتالعان جايت بويىنشا ەڭبەكشى اۋداندىق پوليتسيا باسقارماسى سوتقا دەيىنگى تەرگەۋ امالدارىن جۇرگىزىپ جاتىر. كۇدىكتى قاماۋعا الىندى.
