پرەزيدەنت قاسىم-جومارت توقاەۆ ءماجىلىس توراعاسى ەرلان قوشانوۆتى قابىلدادى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
مەملەكەت باسشىسىنا پارلامەنتتىڭ تومەنگى پالاتاسىنىڭ VIII شاقىرىلىمىنىڭ I سەسسياسى اياسىنداعى قىزمەتى تۋرالى مالىمەت بەرىلدى.
ءماجىلىس سپيكەرى سەسسيا باستالعاننان بەرى ماجىلىسمەندەردىڭ قاراۋىندا بولعان 82 زاڭ جوباسىنىڭ 20-نا دەپۋتاتتار باستاماشىلىق جاساعانىن اتاپ ءوتتى. ولاردىڭ ىشىندە زاڭسىز يەمدەنىلگەن اكتيۆتەردى قايتارۋ، ونلاين-پلاتفورمالار جانە ونلاين-جارناما، سەمەي يادرولىق قاۋىپسىزدىك ايماعى، سۇيىتىلعان گاز اينالىمى، ەلەكترلى ساموكاتتاردىڭ قوزعالىسىن رەتتەۋ تۋرالى جانە باسقا دا زاڭدار بار.
ەرلان قوشانوۆ كونستيتۋتسيالىق رەفورمانىڭ قورىتىندىسى بويىنشا پالاتانىڭ جۇمىس فورماتىنا ەنگىزىلگەن وزگەرىستەر جونىندە اقپارات بەردى. ءماجىلىستىڭ 6 پارتيالىق فراكتسيادان، سونداي-اق ءبىر مانداتتى دەپۋتاتتاردان جاساقتالۋى زاڭ شىعارۋ جۇمىسىنىڭ اشىقتىعىن ارتتىرىپ، سايلاۋشىلارمەن كەرى بايلانىستى كۇشەيتتى. ولار ۇكىمەت مۇشەلەرىنە جولداعان دەپۋتاتتىق ساۋالدارىندا ازاماتتاردىڭ وزەكتى ماسەلەلەرىن كوبىرەك كوتەرە باستادى.
وتكەن سەسسيا بارىسىندا العاش رەت جىلۋمەن قامتاماسىز ەتۋ سالاسىنداعى باسقارۋعا قاتىستى جوعارى اۋديتورلىق پالاتانىڭ ەسەبى تىڭدالدى جانە اتالعان سالادا كەشەندى پروبلەمالار بار ەكەنى انىقتالدى.
توراعانىڭ ايتۋىنشا، دەپۋتاتتار قوعامداعى، سونىڭ ىشىندە وڭىرلەرگە جاساعان ساپارلارى كەزىندە جيناقتاعان پروبلەمالار بويىنشا جاۋاپتى مينيسترلىكتەر باسشىلىعىنىڭ الدىنا بىرقاتار ناقتى ماسەلە قويدى. جىلۋ ەلەكتر ورتالىقتارىن جانە جىلۋمەن قامتاماسىز ەتۋ جەلىلەرىن جاڭعىرتۋعا ەرەكشە نازار اۋدارىلدى.
بۇدان بولەك قوشانوۆ ماجىلىسمەندەردىڭ وڭىرلەردە حالىقپەن كەزدەسۋلەر وتكىزىپ جاتقانىن اتاپ ءوتتى. ساپار بارىسىندا ءماجىلىستىڭ كەلەسى سەسسياسىندا قارالاتىن سۋ، بيۋدجەت، سالىق جانە قالا قۇرىلىسى كودەكستەرىنىڭ جوبالارى بويىنشا تالقىلاۋلار ۇيىمداستىرىلىپ، ۇسىنىستار جيناقتالادى.
