ۇلت ۇستازى احمەت بايتۇرسىنۇلىنىڭ جۇرت بايقاماي جۇرگەن ءبىر كىتاپشاسى تابىلدى، دەپ جازادى "ادىرنا". بۇل تۋرالى احمەت بايتۇرسىنۇلى مۋزەيىنىڭ مەڭگەرۋشىسى ادىلەت احمەت الەۋمەتتىك جەلىدە جازدى.
بارشاعا ءمالىم احمەت بايتۇرسىنۇلىنىڭ "قىرىق مىسالىنىڭ" ىشىندەگى "مايمىل مەن كوزىلدىرىك" شىعارماسى جەكە كىتاپ رەتىندە تابىلدى. كىتاپ وسىدان 101 جىل بۇرىن تاشكەندە ءوڭدى-سۋرەتتى (تسۆەتنوي) ۇلگىدە باسىلعان. عالىم اۋدارعان قۇندى ەڭبەكتىڭ ءبىر پاراسى باسىلىم كورگەنىنە 101 جىل وتكەن.
"«مايمىل مەن كوزىلدىرىك» اتتى مىسال كىتاپشا 1922 جىلى تاشكەنتتە باسىلعان. تۇركىستان رەسپۋبليكاسىنىڭ ءباسپاسوز شىعارۋشى مەكەمەسى جاعىنان باسىلىم كورگەن بۇل جادىگەر ۇلت ۇستازىنىڭ كوزىندەي قىمباتتى مۇرا دەۋگە بولادى. كىتاپشا ءوڭدى-سۋرەتتى ۇلگىدە باسىلعان. باس-اياعى 12 بەتتەن تۇراتىن كىتاپشانىڭ جوباسى كىسىنىڭ كوزىن تارتىپ، كوڭىلىنە ءتۇرلى وي سالادى.
كىتاپتىڭ مۇقاباسىندا جاپا-تارماعاي اعاش باسىنا ورمەلەگەن مايمىلدار بەينەلەنگەن. «مايمىل مەن كوزىلدىرىك» اتتى كىتاپ اتىنان كەيىن «ي. ا. كرىلوۆ حيكاياسىنان قازاقشالاپ جازۋشىسى ا. بايتۇرسىنوۆ» دەپ كورسەتىلگەن" دەپ جازدى اۆتور.
![](https://adyrna.kz/content/uploads/2023/07/izobrazhenie_2023-07-13_140304241.png)
![](https://adyrna.kz/content/uploads/2023/07/izobrazhenie_2023-07-13_140317032.png)
سونداي-اق، ول كىتاپبىڭ باسقى بەتتەرى جىرتىلعانىن جانە كەي ارىپتەرى كورىنبەيتىنىن جازدى.