باتىس ەلدەرى ۋكراينانى قولدايتىنىن جانە بۇل ماسەلەگە قاتىستى ۇستانىمدارىن وزگەرتپەيتىنىن مالىمدەدى، دەپ جازادى "ادىرنا" سايتى. بۇل تۋرالى ۆيلنيۋستە ناتو سامميتىنەن كەيىن سويلەگەن اقش پرەزيدەنتى دجو بايدەن حابارلادى.
«اقش ۋكراينا قازىر جانە بولاشاقتا ءوزىن قورعاي الۋى ءۇشىن 50-دەن استام ەلدەن تۇراتىن كواليتسيا قۇردى»، - دەدى بايدەن. «ءبىز بوستاندىق پەن دەموكراتيا ءۇشىن بۇگىن دە، ەرتەڭ دە، قانشا ۋاقىت قاجەت بولسا، سونشا تۇرامىز»، - دەدى ول.
اق ءۇي باسشىسىنىڭ ايتۋىنشا، رەسەي پرەزيدەنتى ۆلاديمير پۋتين ۋكرايناعا قارسى سوعىستى باستاپ، دەموكراتيالىق كوشباسشىلار ءالسىز بولادى دەپ باتىس ەلدەرىنىڭ بولىنۋىنە ۇمىتتەنگەن. «بىراق ول قاتە ويلادى»، - دەدى بايدەن. پۋتين ءالى كۇنگە دەيىن ناتو وداقتاستارى ءوز قۇندىلىقتارىنان باس تارتپايتىنىن تۇسىنبەيدى، دەدى ول.
دجو بايدەن G7 ەلدەرىنىڭ ۋكرايناعا قاتىستى قاۋىپسىزدىك مىندەتتەمەسىن «كۇشتى سيگنال» دەپ اتادى جانە باسقا ەلدەردى كەلىسىمگە قوسىلۋعا شاقىردى. ونىڭ ايتۋىنشا، G7 ەلدەرى ۋكرايناعا «جەردە، اۋادا جانە سۋدا كۇشتى جانە ءتيىمدى قورعانىس» قۇرۋعا كومەكتەسەدى.
امەريكا پرەزيدەنتى ءوز سوزىندە اقش ءۇشىن ەۋروپالىق قاۋىپسىزدىكتىڭ ماڭىزدىلىعىن اتاپ ءوتتى. ول «اقش قاۋىپسىز ەۋروپاسىز گۇلدەنە الادى» دەگەن تۇسىنىكتى «اقىلعا قونىمسىز» دەپ اتادى. ونىڭ ايتۋىنشا، اقش پەن ەۋروپا اراسىنداعى قارىم-قاتىناس «جاھاندىق تۇراقتىلىقتىڭ تىرەگى» بولىپ تابىلادى.
