تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين استاناداعى ينتەرنەتتىڭ ساپاسى جايلى ايتتى، دەپ حابارلايدى «ادىرنا» ءتىلشىسى.
ول ەلوردانى دامىتۋ ماسەلەلەرى جونىندە كەڭەستە مينيسترلىكتىڭ بايلانىس تولىعىمەن جوق 67 لوكاتسيانى انىقتاعانىن مالىمدەدى.
«ءبىز ەسەپ جۇرگىزىپ، ناتيجەسىندە ينتەرنەت جىلدامدىعى ناشار 67 ورىندى انىقتادىق. ول جەرلەردىڭ تۇرعىندارىمەن
سويلەسكەن كەزىمىزدە ولاردىڭ راديوفوب ەكەندەرى انىقتالدى. كوپشىلىك ءۇيىنىڭ توبەسىنە ستانسا ورناتۋدان قورقادى. اكىمدىك 60 تۇرعىن ءۇي بويىنشا ءتۇسىندىرۋ جۇمىسىن جۇرگىزۋگە كومەك كورسەتتى. قازىرگى تاڭدا وسىنىڭ ىشىندە 33 ءۇي شاتىرىنا بازالىق ستانسا ورناتۋعا كەلىستى. ولاردىڭ بەسەۋىنە ورناتىلدى، ال التاۋىنا قازىر قويىلىپ جاتىر. قالعانى بويىنشا كەلىسىمشارت دايىندالۋ ۇستىندە. 28 ۇيمەن 3 اي بويى جۇمىس ىستەپ كەلەمىز، ولار كەلىسىم بەرمەي وتىر. تۇرعىندارعا بازالىق ستانتسيانىڭ ادام دەنساۋلىعىنا قاۋىپسىز ەكەنىن تۇسىندىرۋدەمىز»،—دەدى مينيستر.
مۋسين بۇل ماسەلە زاڭ اياسىندا رەتتەلۋى قاجەت ەكەنىن اتاپ ءوتتى.
«تۇرعىن ءۇي قاتىناستارى زاڭىنا وزگەرىس ەنگىزىلگەننەن كەيىن تۇرعىنداردىڭ
50 پايىزى ستانسا ورناتۋعا قارسى بولسا، ونى الىپ تاستايمىز. ال ەكىنشى ماسەلە – تاريفتەردىڭ تومەندىگى. ءبىزدىڭ قولدانۋشىلار ۇنەمى ينتەرنەتتە وتىرادى. بۇل ۇلكەن جۇكتەمە. مىسالى، شەتەلدە قانداي دا ءبىر ماتەريالدى اشپاس بۇرىن «بۇل مەن ءۇشىن پايدالى ما، جوق پا؟» دەپ ويلانادى. ويتكەنى، ونى قاراسا، كوپ مەگابايتى كەتەدى»،—دەپ تولىقتىردى باسقارما باسشىسى.
ايتا كەتەيىك، بۇعان دەيىن مينيستر ينتەرنەت ساپاسىنىڭ ناشارلاۋىنا راديوفوبيا دا سەبەپ بولىپ وتقانىن ايتقان ەدى.
