جامبىل وبلىسىنىڭ اۋماعىندا "اۆتوموبيل" رەسپۋبليكالىق جەدەل-الدىن الۋ ءىس-شاراسى اياسىندا مەرەكە جانە دەمالىس كۇندەرى كەڭ اۋقىمدى جەرگىلىكتى تەكسەرۋ جۇمىستارى وتكىزىلدى.
ءىس- شارانىڭ نەگىزگى ماقساتى -جول قاۋىپسىزدىگى پروفيلاكتيكاسى بويىنشا جۇمىستى جانداندىرۋ، جول قوزعالىسى ەرەجەلەرىن بۇزۋشىلىقتاردىڭ، ونىڭ ىشىندە قوعامدىق كولىك جۇرگىزۋشىلەرى تاراپىنان بۇزۋدىڭ جولىن كەسۋ، كولىك قۇرالدارىنىڭ جولداعى قوزعالىس ءتارتىبىن ارتتىرۋ جانە جول قوزعالىسى ەرەجەلەرىنىڭ ساقتالۋىن باقىلاۋ.
ءىس-شاراعا 500-دەن استام پوليتسيا قىزمەتكەرى جانە 155 قىزمەتتىك كولىك قۇرالى جۇمىلدىرىلدى. پوليتسيا قىزمەتكەرلەرى جول قوزعالىسىن باقىلاۋدى كۇشەيتتى. وبلىستىق پاترۋلدىك پوليتسيا باتالونىنىڭ قىزمەتكەرلەرى دە رەسپۋبليكالىق ماڭىزى بار اۆتوجولداردا رەيدتىك تەكسەرۋ جۇمىستارىن جۇرگىزدى. جول ەرەجەلەرىن بۇزعان جۇرگىزۋشىلەردى انىقتاۋعا "درون" ۇشۋ اپپاراتىنىڭ كومەگى ءتيدى. درونداردىڭ ماقساتى جول قوزعالىسى ەرەجەلەرىنىڭ ورەسكەل بۇزىلۋىنا، كوبىنە قارسى قوزعالىس جولاعىنا شىعۋ دەرەكتەرىن انىقتاۋعا باعىتتالعان .
وڭىردەگى اۋماقتاردا جۇرگىزىلگەن جۇمىس ناتيجەسىندە ءۇش تاۋلىك ىشىندە 2540 اكىمشىلىك قۇقىق بۇزۋشىلىق دەرەگى انىقتالدى.
ماسەلەن، 77 جۇرگىزۋشى كولىك باسقارۋدا بەلگىلەنگەن قوزعالىس جىلدامدىعىن اسىرعان. بۇل رەتتە 589 جۇرگىزۋشى قاۋىپسىزدىك بەلدىگىن تاقپاعان، ال 38 جۇرگىزۋشى ءتيىستى قۇجاتتارسىز كولىك قۇرالىن باسقارعان. سونىمەن قاتار، جولدى بەلگىلەنبەگەن ورىننان كەسىپ وتكەن 239 جاياۋ جۇرگىنشى انىقتالدى.
پاترۋلدىك پوليتسيا باتالونىنىڭ قىزمەتكەرلەرى جول قوزعالىسى ەرەجەلەرىن ورەسكەل بۇزۋ دەرەكتەرىنىڭ جولىن كەستى، ونىڭ ىشىندە ماس كۇيىندە كولىك قۇرالىن باسقارۋدىڭ 14 دەرەگى انىقتالدى.
- بۇل ءىس-شارا جۇرگىزۋشىلەر مەن جاياۋ جۇرگىنشىلەردىڭ جولداعى قوزعالىس ءتارتىبىن ساقتامايتىندىعىن تاعى دا كورسەتتى، ال ونىڭ سالدارى جول-كولىك وقيعالارى تۋىنداۋىنىڭ نەگىزگى فاكتورى بولىپ تابىلادى. ۇزدىكسىز جۇرگىزىلىپ جاتقان اۋقىمدى الدىن الۋ جانە اقپاراتتىق- ءتۇسىندىرۋ جۇمىستارىنا قاراماستان، ازاماتتار بەلگىلەنگەن ەرەجە تالاپتارىن بۇزۋدى جالعاستىرۋدا. ازاماتتارىمىز جولداعى جاۋاپكەرشىلىكتىڭ ماڭىزدىلىعىن جانە جول ەرەجەلەرىن ساقتاۋ قاجەتتىلىگىن بارىنشا ءتۇسىنۋى كەرەك. وسى نەمەسە باسقا دا قۇقىق بۇزۋشىلىق قانداي سالدارعا اكەلۋى مۇمكىن ەكەنىن ەشقاشان بولجاۋعا بولمايدى. ويلانباي جاسالعان ارەكەتتىڭ سالدارى وتە اۋىر بولۋى مۇمكىن، - دەپ اتاپ كورسەتتى جامبىل وبلىسىنىڭ پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ مىندەتىن اتقارۋشى پوليتسيا پودپولكوۆنيگى ماناس ابدىكارىموۆ.
