كوممۋنالدىق قىزمەتتەر وڭتۇستىك مەگاپوليستىڭ قاق ورتاسىندا بولعان جىلۋ قۇبىرى اپاتىنىڭ سالدارىن جويۋعا تىرىسىپ جاتىر
الماتى، 10 ءساۋىر – Sputnik. الماتىدا سارسەنبى تاڭەرتەڭ جىلۋ قۇبىرى جارىلىپ، سالدارىنان 4 ادام زارداپ شەگىپ، 7 پاتەر جانە 8 كولىك ءبۇلىندى، دەپ حابارلايدى Sputnik قازاقستان "الماتى جىلۋ جەلىلەرى" جشس-ءنىڭ ءباسپاسوز قىزمەتىنە سىلتەمە جاساپ.
اپات پۋشكين جانە تولە بي كوشەلەرىنىڭ قيلىسىندا تاڭ الاكەۋىم ۋاقىتتا ساعات 04:14 كەزىندە بولعان.
"جىلۋ قۇبىرى جارىلىپ، 4 ادام كۇيىپ قالدى. ولار بىردەن اۋرۋحاناعا جەتكىزىلدى. ودان بولەك كوپقاباتتى تۇرعىن ءۇي كەشەنىنىڭ 7 پاتەرى، سول ماڭعا قويىلعان 8 كولىك ءبۇلىندى", - دەيدى كومپانياداعىلار.
الماتى جىلۋ جەلىسى زارداپ شەگۋشىلەردىڭ شىعىنى ناقتىلانا سالىسىمەن، ونى تولەۋگە دايىن ەكەندىكتەرىن دە ايتتى.
ولار جىلۋ قۇبىرىن جوندەپ، ونى قايتا ىسكە قوسۋ ءۇشىن ءبىر كۇن كەتەتىنىن ايتتى.
ءباسپاسوز قىزمەتى مالىمدەگەندەي، توتەنشە جاعدايعا جىلۋ قۇبىرىنىڭ ابدەن ەسكىرۋى سەبەپ بولعان. ول ارادا جاتقان ديامەترى جارتى مەترلىك قۇبىرلار 1993 جىلى سالىنعان ەكەن.
