Kommýnaldyq qyzmetter ońtústik megapolıstiń qaq ortasynda bolǵan jylý qubyry apatynyń saldaryn joıýǵa tyrysyp jatyr
ALMATY, 10 sáýir – Sputnik. Almatyda sársenbi tańerteń jylý qubyry jarylyp, saldarynan 4 adam zardap shegip, 7 páter jáne 8 kólik búlindi, dep habarlaıdy Sputnik Qazaqstan "Almaty jylý jelileri" JShS-niń baspasóz qyzmetine silteme jasap.
Apat Pýshkın jáne Tóle bı kósheleriniń qılysynda tań alakeýim ýaqytta saǵat 04:14 kezinde bolǵan.
"Jylý qubyry jarylyp, 4 adam kúıip qaldy. Olar birden aýrýhanaǵa jetkizildi. Odan bólek kópqabatty turǵyn úı kesheniniń 7 páteri, sol mańǵa qoıylǵan 8 kólik búlindi", - deıdi kompanııadaǵylar.
Almaty jylý jelisi zardap shegýshilerdiń shyǵyny naqtylana salysymen, ony tóleýge daıyn ekendikterin de aıtty.
Olar jylý qubyryn jóndep, ony qaıta iske qosý úshin bir kún ketetinin aıtty.
Baspasóz qyzmeti málimdegendeı, tótenshe jaǵdaıǵa jylý qubyrynyń ábden eskirýi sebep bolǵan. Ol arada jatqan dıametri jarty metrlik qubyrlar 1993 jyly salynǵan eken.
