وزبەكستان پرەزيدەنتتىگىنە ۇمىتكەر شاۆكات ميرزياەۆ تاشكەنت سايلاۋشىلارىمەن كەزدەسۋ بارىسىندا شۆەتسياداعى قاسيەتتى قۇراننىڭ ورتەنۋىن قاتىگەزدىككە بالادى، دەپ حابارلايدى "ادىرنا" ۇلتتىق پورتالى.
ۋزليدەپ ساياسي پارتياسىنىڭ ءباسپاسوز قىزمەتى حابارلاعانداي، ميرزياەۆ بۇل مالىمدەمەنى 5 شىلدە كۇنى تاشكەنت سايلاۋشىلارىمەن كەزدەسۋ كەزىندە ايتقان.
"جەر بەتىندەگى ميلليونداعان ادامداردىڭ ءدىنى مەن ساف سەزىمدەرىن قورلايتىن مۇنداي جاعدايلارعا جول بەرۋگە بولمايدى", – دەپ اتاپ ءوتتى مەملەكەت باسشىسى.
ميرزياەۆ ءوز سوزىندە ء"ارتۇرلى ۇلتتار مەن حالىقتاردىڭ ءدىني قۇندىلىقتارىن قۇرمەتتەمەيتىن راديكاليزم مەن ەكسترەميزمنىڭ كەز كەلگەن تۇرىنە مۇلدەم قارسى" ەكەنىن اتاپ ءوتتى.
ەسكە سالا كەتەيىك، وسى جىلدىڭ 28 ماۋسىمىندا شۆەتسيانىڭ استاناسى ستوكگولمنىڭ باس مەشىتىنىڭ جانىندا قۇراندى ورتەۋ اكتسياسى ءوتتى. ءىس-شارانى شۆەتسياعا يراكتان بوسقىن رەتىندە كەلگەن سالۆان موميكا ەسىمدى 37 جاستاعى ەر ادام ۇيىمداستىرعانى حابارلاندى.
بۇل ارەكەتتى مۇسىلمان ەلدەرىنىڭ كوپتەگەن ساياساتكەرلەرى، اتاپ ايتقاندا شۆەتسيانىڭ ناتو-عا كىرۋىنە قارسى تۇرىك بيلىگى قاتتى ايىپتادى.
ەسكە سالا كەتەيىك، ريم پاپاسى فرانتسيسك تە وتكەن اپتادا شۆەتسيا استاناسىندا وتكەن قۇراندى ورتەۋ ارەكەتىن ايىپتادى. 3 شىلدەدە شىققان ء"ال-يتتيحاد" گازەتىنە بەرگەن سۇحباتىندا ول مۇسىلمانداردىڭ قاسيەتتى كىتابىنىڭ ورتەنۋىن "جيىركەنىشتى ارەكەت" دەپ اتادى.
"ادىرنا" ۇلتتىق پورتالى
