پرەمەر-مينيستر ءاليحان سمايىلوۆ اتىراۋ مۇناي وڭدەۋ زاۋىتىنداعى اعىمداعى جاعدايمەن تانىسۋ ءۇشىن جۇمىس ساپارىمەن اتىراۋعا بارىپ، جۇمىستاعى ولقىلىقتار ءۇشىن «قازمۇنايگاز» جانە اتىراۋ مۇناي وڭدەۋ زاۋىتى باسشىلىعىن سىنعا الدى، - دەپ حابارلايدى "ادىرنا" ءتىلشىسى ۇكىمەتتىڭ ءباسپاسوز قىزمەتىنە سىلتەمە جاساپ.
زاۋىتتىڭ باس ديرەكتورى مۇرات دوسمۇراتوۆ قازىرگى تاڭدا جەكە گاز تۋربينالىق ەلەكتر ستانساسىن سالۋ جوباسى ازىرلەنىپ جاتقانىن ايتتى.
"3 شىلدەدە ەلەكتر قۋاتىنىڭ اپاتتى سوندىرىلۋىنە بايلانىستى زاۋىت جۇمىسى تۇگەل دەرلىك توقتاتىلدى. وسىعان ۇقساس جاعدايلار ەكى جىل بۇرىن ورىن العان. سول كەزدىڭ وزىندە كاسىپورىنعا ەلەكترمەن جابدىقتاۋدىڭ جەكە كوزى قاجەت ەكەنى بەلگىلى بولدى. ارينە، بۇل تەك اتىراۋ مۇناي وڭدەۋ زاۋىتىنىڭ مىندەتى ەمەس، «قازمۇنايگاز» دا قاجەتتى جۇمىستاردى اتقارۋى كەرەك ەدى»، - دەپ جاۋاپ بەردى ءاليحان سمايىلوۆ.
"زاۋىت ستراتەگيالىق ماڭىزى بار نىسان بولىپ تابىلادى، ول سىرتقى ەلەكتر ەنەرگياسىنا تاۋەلدى بولماۋى كەرەك. ياعني، اپاتتى جاعدايدا توقتاعان جاعدايدا كاسىپورىننىڭ تۇراقتى جۇمىسىن قامتاماسىز ەتەتىن جەكە قوسالقى ستانتسيانى ىسكە قوسۋ كەرەك. 2028 جىلعا دەيىن ۇزارتىلماي، الداعى 2-3 جىلدا جۇزەگە اسىرىلۋى ءتيىس. ءبىز بۇل ۇدەرىستى جەدەلدەتۋىمىز كەرەك»، - دەدى پرەمەر-مينيستر قمگ مەن اتىراۋ مۇناي وڭدەۋ زاۋىتىنىڭ باسشىلارىنا سويلەگەن سوزىندە.
مۇرات دوسمۇراتوۆ توتەنشە جاعدايعا قاراماستان زاۋىتتان مۇناي ونىمدەرىن جونەلتۋ توقتاماي، بۇرىنعىداي جالعاسىپ جاتىر دەپ سەندىردى.
«زاۋىت تاۋلىگىنە 5 مىڭ تونناعا جۋىق بەنزين مەن 6 مىڭ توننا ديزەل وتىنىن شىعارۋدا. قازىر جيناقتالعان قوردان تيەۋ جۇرگىزىلۋدە. جالپى بۇگىندە 22 مىڭ توننا بەنزين، 26 مىڭ توننا ديزەلدىك وتىن جانە 5 مىڭ توننا اۆياكەروسين بار. ياعني، زاۋىت تولىق قۋاتتىلىققا شىققانشا جونەلتۋ جوسپارىن تولىق ورىنداۋ ءۇشىن بىزدە مۇناي ونىمدەرىنىڭ قورى جەتكىلىكتى»، - دەدى اتىراۋ مۇناي وڭدەۋ زاۋىتىنىڭ باس ديرەكتورى.
ەسكە سالايىق، سەيسەنبى كۇنى وتكەن ۇكىمەت وتىرىسىندا ءاليحان سمايىلوۆ «قازمۇنايگاز» اق باسقارما توراعاسىنىڭ ورىنباسارى داۋلەتجان حاسانوۆتىڭ اتىراۋ مۇناي وڭدەۋ زاۋىتى مەن ماەك-تەگى اپاتتاردان كەيىنگى جاعداي تۋرالى ەسەبىن سىنعا الىپ، بايانداماداعى اقپاراتتىڭ ەسكىرگەنىن ايتقان بولاتىن.
