ايسۇلتان سەيىتوۆ قازاقستان جايلى كەرەمەت ۆيدەو ءتۇسىردى

ايسۇلتان سەيىتوۆ تانىمال #Followmeto جوباسىنىڭ اۆتورلارى مۇرات جانە ناتاليا وسماننمەن بىرگە قازاقستان تۋرالى ۆيدەو ءتۇسىردى. ۆيدەودا ەلىمىزدىڭ ەڭ ادەمى، كورىكتى جەرلەرى كورسەتىلگەن.

#Followmeto جوباسىنىڭ اۆتورلارى Youtube سايتىنداعى ارنادا قازاقستاننىڭ سۇلۋلىعىنا، ۆيدەوعا قاتىستى ويلارىمەن بولىسكەن.

"قازاقستان، بۇل ۆيدەو سەن جايىندا. نە سەزىندىك، نە كورسەتكىمىز كەلدى — بارلىعى وتە ادەمى ەل جايلى ۆيدەودا. قازاقستاندا ءبىز كەرەمەت ادامداردى كەزدەستىردىك. مەن ولار وسى ۆيدەونى باعالاپ، ونى بۇكىل الەم كورۋى ءۇشىن باسقالارمەن بولىسەدى دەپ ۇمىتتەنەمىن. مىڭ ءسوزدىڭ ورنىنا وسى ۆيدەو", — دەپ جازعان.

ەستەرىڭىزگە سالا كەتەيىك، قازاقستاننان شىققان جاس، دارىندى رەجيسسەر ايسۇلتان سەيىتوۆ ءوزىنىڭ شەبەرلىگىمەن الەمدىك دەڭگەيدەگى جۇلدىزداردى تاڭعالدىرىپ، گولليۆۋدتى باعىندىرعان وتانداستارىمىزدىڭ ءبىرى. ونىڭ قىسقامەتراجدى "شاكال" اتتى ءفيلمى  Hollywood Boulevard Film Festival كينوفەستيۆالىندە باس جۇلدەنى يەلەنگەن.

سەيىتوۆ رەجيسسۋراداعى العاشقى جولىن عالىمجان مولدانازار، Ninety One سىندى تانىمال قازاقستاندىق انشىلەر مەن توپتارعا بەينەبايان تۇسىرۋدەن باستاعان. جاقىندا ول Offset, 21 Savage سىندى الەمدىك دەڭگەيدەگى رەپ جۇلدىزدارىمەن تىعىز جۇمىس جاساپ، ولارعا بەينەبايان ءتۇسىرىپ بەردى.