رەسەي فەدەراتسياسى پرەزيدەنتىنىڭ ءباسپاسوز حاتشىسى دميتري پەسكوۆ رەسەيدە بولعان قارۋلى بۇلىك تۋرالى قىلمىستىق ءىستىڭ توقتاتىلىپ، "ۆاگنەر" جاساعىنىڭ دالا لاگەرلەرىنە ورالاتىنى، ال ەۆگەني پريگوجيننىڭ ءوزى بەلارۋس ەلىنە باراتىنىن حابارلادى، دەپ جازادى "ادىرنا" ۇلتتىق پورتالى.
رەسەيدە 24 ماۋسىم كۇنى دۇربەلەڭ بولدى. "ۆاگنەر" جاساعىنىڭ نەگىزىن قالاۋشى ەۆگەني پريگوجين جۇما كۇنى ماسكەۋگە باعىت الىپ،" ادىلەت شەرۋىن" ۇيىمداستىردى. جولشىباي دونداعى روستوۆ ورتالىعىن باقىلاۋعا الدى. قالا ورتالىعىنا اسكەري تەحنيكا تولتىرىپ، وقتىن-وقتىن ساياسي مالىمدەمەلەر جاسادى. رەسەي بيلىگىن باقىلاۋعا الۋعا ءۇمىتتى ەكەنىن جەتكىزدى. باسشىلىقتان دامەلى ەكەنىن جاسىرمادى.
دەگەنمەن سەنبىنىڭ كەشىندە اياق استىنان شالا ءبۇلىنىپ، ءوز رايىنان قايتقانىن حابارلادى. "قاردىڭ سۋى سەكىلدى تەز سۋ العان" پريگوجيننىڭ سارساڭىنا سەنگەندەر دە، سەنبەگەندەر دە جاعدايدى قالت جىبەرمەي، قىزىقتاپ وتىردى. اسىرەسە، الەۋمەتتىك جەلى تاقتاسى ساياسي ساراپتاماعا بويلاپ، ءتۇرلى بولجام ايتقانداردىڭ جازباسىنا تولىپ كەتتى. ۇلتتىق اقپارات كەڭىستىگىندە رەسەيدەگى احۋالدى سان-cاققا جۇگىرتكەن نەبىر ساراپتاماشىلار جاۋىننان كەيىن قاپتاعان اتقۇلاقتاي "بۇرق" ەتە قالدى.
ايتقانى ايداي بولعاندار "ايتتىم عوي" مەن اينالاسىن تۇيرەي ءوتىپ، بولجامى بۇلىڭعىر شىققاندار ءۇنسىز تىنىپ جاتتى.
اسىلىندا، مالىمدەمەلەر نە دەيدى؟
شيرىققان جاعدايعا لۋكاشەنكونىڭ ارالاسقانى ايتىلادى. ءپۋتيننىڭ ءباسپاسوز حاتشىسىپەسكوۆتىڭ سوزىنە سەنسەك، لۋكاشەنشونىڭ ءوزى پريگوجينمەن 20 جىلداي ارلاس-قۇرالاستىعى بارىن ايتىپ، كەلىسسوز جۇرگىزۋدى ۇسىنعان.
"الەكساندر گريگورەۆيچ [لۋكاشەنكو] پريگوجينمەن بۇرىننان تانىس، بۇل ونىڭ جەكە ۇسىنىسى بولدى. ءبىز وسى ىسكە ات سالىسقان ول كىسىگە رازىمىز", - دەپ مالىمدەدى رەسەي فەدەراتسياسى پرەزيدەنتىنىڭ ءباسپاسوز حاتشىسى دميتري پەسكوۆ.پريگوجيننىڭ ءوزى كەشە شالا ءبۇلىنىپ، تابان استىندا توسىن مالىمدەمە جاساعان ەدى. پريگوجين اۋديوحابارلاما ارقىلى:
ء"بىز كۇنى بويى جۇردىك. ماسكەۋگە 200 شاقىرىم عانا قالعان. وسى ۋاقىتقا دەيىن ساربازدارىمىزدىڭ قانى توگىلمەدى. قازىر قان توگىلۋى مۇمكىن. سونداي ءسات تۋدى. سوندىقتان بارلىق جاۋاپكەرشىلىكتى تۇسىنە وتىرىپ، ورىستاردىڭ قانى توگىلۋى مۇمكىن ەكەنىن ەسكەرە وتىرىپ، ءبىز ءوز جاساعىمىزدىڭ باعىتىن كەرى بۇرامىز. جوسپارعا ساي دالا لاگەرىنە تابان تىرەيمىز", - دەگەن-تۇعىن.پريگوجيندى جازالاۋعا كەلگەندە پۋتين قۇلىقسىزدىق تانىتقانداي. كەشە وتانىنا وپاسىزدىق جاسادى دەپ ايىپتاسا، بۇگىن "جوقتاۋىن اسىرۋدى" ماقسات ەتكەن. پەسكوۆ ءپۋتيننىڭ مۇنداي اسقان "سالقىنقاندىلىعى" جايىندا دا ءوز ەتتى. ول رەسەي باسشىسىنىڭ جاقىن ۋاقىتتا ۇندەۋ جاساي قويمايتىنىن، ال بۇلىك وقيعاسىنىڭ "ارنايى وپەراتسياعا" ەش اسەر ەتپەيتىنىن اتاپ ءوتتى. جۋرناليستەرگە پريگوجيننىڭ "كەلەشەكتەگى بەت الار باعىتىن" ايقىنداپ بەردى. پريگوجيننىڭ جاڭا باعىتى ماسكەۋ ەمەس، مينسك. ءباسپاسوز حاتشىسىنىڭ ايتۋىنشا، پريگوجينگە قاتىستى قىلمىستىق ءىس توقتاتىلىپ، ءوزى بەلارۋسكە بارادى. كوتەرىلىسكە قاتىسقان ساربازداردىڭ باسقىنشىلىق كەزىندەگى ەڭبەگى ەسكەرىلىپ، سوعان ساي قۋدالانبايدى، ال كولونناعا قوسىلماعان جاۋىنگەرلەردىڭ ءبىر بولىگى قورعانىس مينيسترلىگىمەن كەلىسىمشارتتارعا قول قويادى.
جيناقتاي ايتساق، 24 ماۋسىمدا بەلارۋس پرەزيدەنتى الەكساندر لۋكاشەنكونىڭ "ۆاگنەر" كوللوناسىن توقتاتۋ ءۇشىن پريگوجيندى كوندىرگەنى ءمالىم بولدى. كەلىسسىوزدىڭ كۇنى بويى جۇرگىزىلگەنى ايتىلادى. كەشقۇرىم رەسەيلىك اقپارات اگەنتتىكتەرى "ۆاگنەر" جاساعى جاۋىنگەرلەرى روستوۆتاعى وڭتۇستىك اسكەري وكرۋگتىڭ شتاب-پاتەرىن تاستاپ كەتە باستاعانىن راستادى.
"ادىرنا" ۇلتتىق پورتالى
ۇقساس جاڭالىقتار
دميتري پەسكوۆ
رەسەي فەدەراتسيا
بەلارۋس پرەزيدەنتى
رەسەي ۋكراين سوعىسى
كرەمل بيلىگى
ەۆگەني پريگوجين
ساياسي وقيعالار
ساياسي جاڭالىقتار
پۋتلەر ساياساتى
