شەشەن رەسپۋبليكاسىنىڭ باسشىسى رامزان كادىروۆ «ۆاگنەر» باسشىسى ەۆگەني پريگوجيننىڭ ءىس-ارەكەتىنە قاتىستى پىكىر ءبىلدىردى. بۇل تۋرالى ول ءپۋتيننىڭ ۇندەۋىنەن كەيىن ءوزىنىڭ Telegram-ارناسىندا ايتتى، دەپ حابارلايدى “ادىرنا” ۇلتتىق پورتالى.
ول سوعىس كەزىندە جەكە باسقا قاتىستى وكپە-رەنىشتى شەشۋدى قويا تۇرۋدى ايتىپ، قازىر ءبىر-بىرىمەن جاۋلاساتىن ۋاقىت ەمەستىگىن ەسكەرتكەنىن اتاپ ءوتتى.
دوستار، مەنىڭ روستوۆتاعى، جالپى ەلىمىزدەگى جاعدايعا دەر كەزىندە جاۋاپ بەرە الماعانىمنىڭ سەبەبىن ايتسام، مەنىڭ ۋاقىتىم بولمادى. تۇنىمەن شارۋالارمەن شاپقىلاپ ءجۇرىپ، ەندى عانا ساتقىندىق تۋرالى ەستىپ، ءبىلىپ وتىرمىن. بۇگىنگى وپاسىزدىق ءبىزدىڭ ارقامىزعا قادالعان پىشاق بولدى.
مەن وعان (پريگوجيندى ايتادى، - رەد) تالاي رەت سوعىس كەزىندە جەكە باسقا قاتىستى وكپە-رەنىشتى شەشۋدى قويا تۇرۋدى ايتقانمىن. ول تىڭدامادى. ول بۇكىل مەملەكەتكە قارسى شىقتى. مەن حالىقتىڭ قالاۋىمەن سايلانعان جوعارى باس قولباسشىمىزدى قولدايمىن. بىزگە ەلدىڭ ساياسي تۇراقتىلىعى، حالىقتىڭ بىرلىگى، وتانداستارىمىزدىڭ قاۋىپسىزدىگى كەرەك، – دەدى ول.
قادىروۆتىڭ ايتۋىنشا، پريگوجيننىڭ ارەكەتى جاعدايدى قيىنداتىپ جاتىر. مۇنداي ارەكەتتەر تاريحتا قانتوگىسپەن اياقتالعان.
ەسكە سالساق، 24 ماۋسىمعا قاراعان ءتۇنى ەۆگەني پريگوجين رەسەي قورعانىس مينيسترلىگىن سوققى بەردى دەپ ايىپتاپ، قارۋلى قاقتىعىس باستالعانىن مالىمدەگەن. كەيىنىرەك ەۆگەني پريگوجينگە قارسى قارۋلى كوتەرىلىس ۇيىمداستىرۋ فاكتىسى بويىنشا قىلمىستىق ءىس قوزعادى.
