ۋكراينادا پرەزيدەنت سايلاۋى ءوتىپ جاتىر

2037

ناۋرىزدىڭ 31-ءى كۇنى ۋكراينادا پرەزيدەنت سايلاۋى باستالدى. ورتالىق سايلاۋ كوميسسياسى پرەزيدەنتتىكتەن ۇمىتكەر 39 ازاماتتى تىركەگەن. بۇل - بۇرىن-سوڭدى بولماعان جوعارى كورسەتكىش. رەسەيدە سايلاۋ ۋچاسكەلەرى بولماعاندىقتان ەكى وبلىس تۇرعىندارى نۇر-سۇلتانعا بارىپ، داۋىس بەرەدى.

ۋكراينادا ازاماتتار كيەۆ ۋاقىتىمەن تاڭعى ساعات 8-دەن باستاپ داۋىس بەرە باستادى. ەلدە اشىلعان 30 مىڭ سايلاۋ ۋچاسكەسى كەشكى ساعات 8-گە دەيىن ىستەيدى. رەسەي اننەكسيالاپ العان قىرىم مەن كيەۆكە باعىنبايتىن دونباستاعى اۋماق تۇرعىندارى داۋىس بەرۋ ءۇشىن وزدەرىنە جاقىن سايلاۋ ۋچاسكەلەرىنە بارۋى ءتيىس.

ۋكراينانىڭ ىشكى ىستەر ءمينيسترى ارسەن اۆاكوۆ بۇعان دەيىن كيەۆكە قارايتىن سايلاۋ ۋچاسكەلەرىن 130 مىڭنان استام پوليتسيا قىزمەتكەرى كۇزەتەتىنىن حابارلاعان.

ۋكراينانىڭ ورتالىق سايلاۋ كوميسسياسى 17 ەل جانە 19 حالىقارالىق ۇيىمنان كەلگەن شامامەن 2400 حالىقارالىق باقىلاۋشىنى تىركەگەن. بىراق ولاردىڭ اراسىندا رەسەي ازاماتتارى جوق. جوعارى رادا بۇعان دەيىن رەسەيدى "اگرەسسور مەملەكەت" رەتىندە تانىپ، سايلاۋدى باقىلاۋ مۇمكىندىگىنەن ايىرعان.

قازاقستانداعى سايلاۋ ۋچاسكەسى

بۇعان دەيىن كيەۆ رەسەيدە سايلاۋ ۋچاسكەلەرى دە بولمايتىنىن حابارلاعان.

سول سەبەپتى رەسەيدىڭ ەكى وبلىسى ءنوۆوسىبىر جانە سۆەردلوۆ وبلىسىنىڭ تۇرعىندارى قازاقستان استاناسى نۇر-سۇلتان قالاسىنداعى ۋكراينا ەلشىلىگىندە داۋىس بەرەدى.

"رەسەي اۋماعىندا سايلاۋ ۋچاسكەسى بولماعاندىقتان ونداعى نوۆوسيبيرسكى جانە سۆەردلوۆ وبلىسى دا ءبىزدىڭ ۋچاسكەگە قوسىلعان" دەدى نۇر-سۇلتان قالاسىنداعى سايلاۋ ۋچاسكەسىنىڭ توراعاسى ۆيتالي لوكتەۆ 31 ناۋرىزدا ازاتتىق تىلشىسىنە.

نۇر-سۇلتانداعى سايلاۋ ۋچاسكەسى. 31 ناۋرىز 2019 جىل.
نۇر-سۇلتانداعى سايلاۋ ۋچاسكەسى. 31 ناۋرىز 2019 جىل.

ونىڭ ايتۋىنشا، داۋىس بەرۋگە قۇقىعى بار قازاقستان بويىنشا - مىڭنان استام ادام، ال رەسەي بويىنشا ءۇش مىڭنان استام ادام تىركەلگەن. تۇسكى ساعات 11-گە دەيىن 33 ادام داۋىس بەرگەن. بۇل - قازاقستان بويىنشا جۇمىس ىستەپ جاتقان جالعىز سايلاۋ ۋچاسكەسى. بۇگىن ول جاققا كەلگەن ازاماتتار اراسىندا الماتى، سەمەي، پەتروپاۆلدان كەلگەندەر بولعان.

رەسەي 2014 جىلى ۋكراينا قۇرامىنداعى قىرىم تۇبەگىن اننەكسيالاپ العاننان كەيىن ەكى ەل اراسىنداعى جاعداي كۇرت ناشارلاعان. سول جىلى ساۋىردە دونەتسك مەن لۋگانسك وبلىستارىندا رەسەيشىل سەپاراتيستەر مەن ۋكراينا اسكەرى اراسىندا سوعىس باستالعان. قاقتىعىستاردان 10 مىڭنان استام ادام قازا تاپقان. كيەۆ ماسكەۋدى رەسەيشىل سەپاراتيستەردى قولداپ وتىر دەپ ايىپتايدى. بىراق ماسكەۋ ونى جوققا شىعارادى. 2015 جىلى اقپاندا مينسكىدە قاقتىعىستى توقتاتۋ جونىندە كەلىسىم جاسالعانىمەن، ول ءالى كۇنگە تولىق ورىندالماي كەلەدى.

ۋكرايناداعى پرەزيدەنت سايلاۋىنا تۇسەتىن جالپى كانديداتتار سانى – 39. ولاردىڭ اراسىندا شوۋمەن ۆلاديمير زەلەنسكي، قازىرگى پرەزيدەنت پەتر پوروشەنكو مەن وپپوزيتسيالىق "باتكيۆششينا" پارتياسىنىڭ ليدەرى يۋليا تيموشەنكو بار.

الەۋمەتتىك زەرتتەۋ حالىقتىڭ كانديداتتار اراسىندا اكتەر ۆلاديمير زەلەنسكيدى كوبىرەك قولدايتىنىن (20,3%) كورسەتكەن. ودان كەيىن "باتكيۆششينا" پارتياسىنىڭ جەتەكشىسى، بۇرىنعى پرەمەر-مينيستر يۋليا تيموشەنكو (13,9%), قازىرگى پرەزيدەنت پەتر پوروشەنكو (13,1%) تۇر.

ەگەر ۇمىتكەرلەردىڭ ەشقايسىسى سايلاۋشىلاردىڭ 50 پايىزدان استام داۋىسىنا يە بولا الماسا، وندا سايلاۋدىڭ ەكىنشى كەزەڭى وتەدى. وعان العاشقى كەزەڭدە كوبىرەك داۋىس جيناعان ەكى كانديدات قاتىسادى. ساياساتتانۋشىلار سايلاۋدىڭ ەكىنشى كەزەڭى ءوتۋى مۇمكىن دەپ سانايدى.

وسىمەن ۋكراينادا جەتىنشى رەت پرەزيدەنت سايلاۋى ءوتىپ جاتىر.

"ازاتتىق" راديوسى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket