قازاقستان-رەسەي شەكاراسىنىڭ ("قايراق" (قر) – "بۋگريستوە" (رف), "سىرىم" (قر) – "ماشتاكوۆو" (رف) وتكىزۋ پۋنكتتەرى), قازاق-قىرعىز شەكاراسىنىڭ ("قاراسۋ" (قر) – "اق-تىلەك" (قىرعىز رەسپۋبليكاسى) وتكىزۋ پۋنكتتەرى) جانە قازاق-وزبەك شەكاراسىنىڭ ("جىبەك جولى" (قر) – "گيشت-كۋپريك" ء(وزر), "قازىعۇرت" (قر) – "تاشكەنت" ء(وزر), "اتامەكەن" (قر) – "گۋليستان" ء(وزر) وتكىزۋ پۋنكتتەرى) جەكەلەگەن باعىتتارىندا ادامدار مەن كولىك قۇرالدارىنىڭ كەپتەلىسى بولىپ جاتىر.
ۇلتتىق قاۋىپسىزدىك كوميتەتى مۇنىڭ بىرنەشە سەبەبىن اتادى. ولاردىڭ ىشىندە بۇل باعىتتارداعى وتكىزۋ پۋنكتتەرىنىڭ كەيبىرىندە ءىشىنارا جوندەۋ جۇمىستارىنىڭ جۇرگىزىلۋى، ماۋسىمدىق كوكونىس ونىمدەرىن تاسىمالداۋعا بايلانىستى شىعارىلاتىن جۇك تاسىمالىنىڭ ارتۋى، كولىك تاسىمالداۋ ۇيىمدارىنىڭ ترانزيتتىك الەۋەتىن جوعارىلاتۋى، تۋريستىك كەزەڭدەگى جولاۋشىلار لەگىنىڭ كوبەيۋى سىندى سەبەپتەر بار.
كوميتەت قازاقستاندىق وتكىزۋ پۋنكتتەرىنىڭ تاۋلىك بويى جۇمىس ىستەپ تۇرعانىن حابارلادى.
"شەكارادان وتەتىن كولىك قۇرالدارىن قاراۋ مەن ادامداردىڭ قۇجاتتارىن تەكسەرۋدە قازىرگى زامانعى جانە اۆتوماتتاندىرىلعان جۇيەلەردى قولدانۋ ارقىلى ادامدار مەن كولىكتەر كەپتەلىسىن ازايتۋ بويىنشا شارالار قابىلدانۋدا", - دەپ حابارلادى قر ۇقك ءباسپاسوز قىزمەتى.
