الەۋمەتتىك جەلىلەردە الماتى وبلىسىنداعى ورتاعاسىرلىق تالحيز قالاشىعى تۋرالى ۆيدەو كەڭىنەن تالقىلانىپ جاتىر. ۆيدەو اۆتورى يۋنەسكو تىزىمىنە ەنگەن تاريحي نىسانعا بارعانىمەن، كەشەن قاقپاسىنىڭ جابىق بولعانىنا شاعىمداندى، دەپ حابارلايدى “ادىرنا”.
بلوگەر ءارى ساياحاتشى ۆلاديسلاۆ تالعارعا ساپارى كەزىندە تالحيز قالاشىعىنا كەزدەيسوق تاپ بولعانىن ايتتى. الايدا نىسانعا كىرە الماعان.
"تالعارعا ۆيدەو تۇسىرۋگە كەلىپ، يۋنەسكو مۇرالار تىزىمىنە كىرەتىن تالحيز قالاشىعىن كوردىم. بىراق جەتكەنىمدە جابىق بولدى. قوڭىراۋ شالعانىمدا ەكسكۋرسيانى الدىن الا برونداۋ كەرەكتىگىن ءتۇسىندىردى. سول كەزدە مامان كەلىپ، ءبارىن كورسەتەدى ەكەن", – دەدى ول.
ساياحاتشىنىڭ پىكىرىنشە، بۇل اۋماقتىڭ تۋريستىك الەۋەتى جوعارى. ونىڭ ويىنشا، مۇندا ۇلتتىق ستيلدەگى قولونەر شەبەرحانالارى مەن شىعىس بازارلارى بار ەتنوقالاشىق جاساۋعا بولادى.
"ەسىك" مەملەكەتتىك تاريحي-مادەني مۋزەي-قورىعىنىڭ مالىمەتىنشە، تالحيز قالاشىعى دۇيسەنبىدەن جۇماعا دەيىن جۇمىس ىستەيدى. ەكسكۋرسيالار الدىن الا جازىلۋ ارقىلى ۇيىمداستىرىلادى.
"ەكسكۋرسيا ۋاقىتىن الدىن الا كەلىسىپ، كەلۋشىلەر سانىن ناقتى كورسەتۋ قاجەت", – دەپ حابارلادى مۋزەي-قورىق وكىلدەرى.
مامانداردىڭ ايتۋىنشا، جۇمىس كۇندەرى نىسان كەلۋشىلەر ءۇشىن اشىق. الايدا توپپەن بارۋدى جوسپارلاعاندار مىندەتتى تۇردە الدىن الا حابارلاسۋى ءتيىس.
تالحيز قالاشىعى 2014 جىلى يۋنەسكو-نىڭ بۇكىلالەمدىك مۇرالار تىزىمىنە ۇلى جىبەك جولىنا قاتىستى ترانسۇلتتىق نىسان قۇرامىندا ەنگىزىلگەن. ال 2018 جىلدان بەرى "ەسىك" مۋزەي-قورىعىنىڭ قاراماعىندا.
قازىر اۋماقتا ارحەولوگيالىق جانە عىلىمي زەرتتەۋلەر جالعاسىپ جاتىر. عالىمدار ورتاعاسىرلىق قالا مادەنيەتى مەن ۇلى جىبەك جولىنىڭ تاريحىن زەرتتەۋدە..
