"ەستىپ تۇرسىز با؟" نازارباەۆتىڭ تاپسىرماسىن ورىنداماعان شەنەۋنىك ءسوز ەستىدى

1944
Adyrna.kz Telegram

نىعماتۋلين "اۋىل – ەل بەسىگى" جوباسىن ازىرلەمەگەن مينيسترلىكتىڭ جۇمىسىن سىنعا الدى

"اۋىل – ەل بەسىگى" باعدارلاماسىن بەكىتۋ نەگە كەشەۋىلدەپ جاتقانىن تۇسىندىرە الماعان ۇلتتىق ەكونوميكا ۆيتسە-ءمينيسترى ءماجىلىس توراعاسى نۇرلان نىعماتۋليننەن ءسوز ەستىدى، دەپ حابارلايدى Sputnik قازاقستان-عا سىلتەمە جاساعان "ادىرنا" پورتالى.

بۇگىن ءماجىلىستىڭ جالپى وتىرىسىندا اگروونەركاسىپتىك كەشەندى رەتتەۋ ماسەلەلەرى تۋرالى زاڭ جوباسى قارالدى. سۇراق-جاۋاپ بارىسىندا دەپۋتات رومان كيم ۇلتتىق ەكونوميكا مينيسترلىگىنىڭ وكىلىنەن "اۋىل – ەل بەسىگى" ارنايى جوباسىنىڭ نەگە ءالى كۇنگە دەيىن بەكىتىلمەگەنىن سۇرادى. ايتا كەتسەك، بىلتىر قازان ايىندا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ "رۋحاني جاڭعىرۋ" باعدارلاماسى اياسىندا "اۋىل – ەل بەسىگى" جوباسىن ازىرلەۋدى تاپسىرعان بولاتىن.

"ول ءوندىرىستى كەڭەيتىپ قانا قويماي، اۋىل حالقىنىڭ تۇرمىسىن جاقسارتۋعا مۇمكىندىك بەرەدى. وسى ماقساتقا جول قۇرىلىسىنا بولىنگەن 160 ميلليارد تەڭگە مەن اۋىز سۋمەن قامتاماسىز ەتۋگە باعىتتالعان 100 ميلليارد تەڭگەنى قوسپاعاندا، 2019-2021 جىلدار ارالىعىندا 90 ميلليارد تەڭگە ءبولىنىپ وتىر. ەل ءۇشىن زور ماڭىزعا يە جوبانى ازىرلەۋ مەن بەكىتۋ نەگە كەشىكتىرىلىپ جاتىر؟", - دەپ سۇرادى ماجىلىسمەن.

ۇلتتىق ەكونوميكا ۆيتسە-ءمينيسترى ەرمەك الپىسوۆ "اۋىل – ەل بەسىگى" جوباسى بويىنشا قازىر ۇلتتىق ەكونوميكا مينيسترلىگى اكىمشى ەكەنىن اتاپ ءوتتى. ايتۋىنشا، 6,5 مىڭ ەلدى مەكەننىڭ ىشىنەن كەلەشەگى بار 1781 اۋىل انىقتالعان.

"وسى اپتانىڭ سوڭىنا دەيىن جوبا ءتىزىمىن تولىعىمەن اياقتايمىز. بيىل 30 ميلليارد تەڭگەگە 500 جوبانى ىسكە اسىرۋ جوسپارلانىپ وتىر... قازىر وڭىرلىك ستاندارتتار جۇيەسى ازىرلەنگەن، ول ادىلەت مينيسترلىگىندە تىركەۋدە جاتىر. اكىمدەر ءدال وسى وڭىرلىك ستاندارتتار نەگىزىندە جۇمىس ىستەيدى", - دەدى الپىسوۆ.

ءماجىلىس توراعاسى نۇرلان نىعماتۋلين ۆيتسە-ءمينيستردىڭ جاۋابىنا قاناعاتتانبادى.

"ەلباسى بىلتىر كۇزدە تاپسىرما بەردى. بۇگىن قاسىم-جومارت كەمەلۇلى اكىمدەرمەن جيىن وتكىزىپ، وڭىرلەردەگى ينفراقۇرىلىمدىق جوبالارعا باسا نازار اۋداردى. ال ءسىز قازىر مەملەكەتتىك ورگانداردىڭ ءبىر قاعازدى كەلىسە الماي جاتقانىن ايتىپ وتىرسىز. ءبىز قازىر ناۋرىز ايىندامىز، جارتى جىل ءوتتى. نەگە كەشەۋىلدەپ جاتىر؟", - دەپ سۇرادى ءماجىلىس سپيكەرى.

جەڭىس قاسىمبەك

ء"بىز ايماقتاردىڭ وڭىرلىك ستاندارتتاردى ۇستانعانىن قالايمىز. وسى اپتا تولىعىمەن تىركەپ، باعدارلامانى ىسكە قوسامىز", - دەپ سەندىردى الپىسوۆ.بىراق بۇل جاۋاپ تا نىعماتۋليننىڭ كوڭىلىنەن شىقپادى.

"ەرمەك امانتايۇلى، سۇراقتى ەستىپ تۇرسىز با؟ اقشا ءبولىندى، دەپۋتاتتار ءۇش جىلدىق بيۋدجەتتى بەكىتتى. اقشا بار، اكىمدەر دە، وڭىرلەر دە دايىن. پروبلەما نەدە؟ ءبىر جاپىراق قاعازدى ءبىر مەملەكەتتىك ورگاننان ەكىنشىسىنە جەتكىزۋگە جارتى جىل جۇمسايسىزدار؟!... وتكەن جىلدىڭ سوڭىنا دەيىن اياقتاۋ تۋرالى تاپسىرما بەرىلدى. ناۋرىزدا جۇمىس باستالۋى كەرەك بولاتىن، وڭىرلەردە تەندەر وتكىزىلۋى ءتيىس ەدى. ال ءسىز ماعان تاعى ءبىر جۇما تۋرالى اڭگىمە ايتىپ وتىرسىز", - دەپ اشۋلاندى ول.

الپىسوۆ باعدارلامانى كوپ ۇزاماي بەكىتەمىز دەپ سەندىردى.

"بەكىتپەي قايدا باراسىز؟ بارىپ تۇرعان جاۋاپسىزدىق بۇل، تۇسىنەسىز بە؟! بۇلاي جۇمىس ىستەۋگە بولمايدى، ەرمەك امانتايۇلى. ىسكە كىرىسىڭىز", - دەپ ەسكەرتۋ جاسادى نىعماتۋلين.

 

پىكىرلەر