Nyǵmatýlın "Aýyl – el besigi" jobasyn ázirlemegen mınıstrliktiń jumysyn synǵa aldy
"Aýyl – el besigi" baǵdarlamasyn bekitý nege kesheýildep jatqanyn túsindire almaǵan ulttyq ekonomıka vıe-mınıstri májilis tóraǵasy Nurlan Nyǵmatýlınnen sóz estidi, dep habarlaıdy Sputnik Qazaqstan-ǵa silteme jasaǵan "Adyrna" portaly.
"Ol óndiristi keńeıtip qana qoımaı, aýyl halqynyń turmysyn jaqsartýǵa múmkindik beredi. Osy maqsatqa jol qurylysyna bólingen 160 mıllıard teńge men aýyz sýmen qamtamasyz etýge baǵyttalǵan 100 mıllıard teńgeni qospaǵanda, 2019-2021 jyldar aralyǵynda 90 mıllıard teńge bólinip otyr. El úshin zor mańyzǵa ıe jobany ázirleý men bekitý nege keshiktirilip jatyr?", - dep surady májilismen.
Ulttyq ekonomıka vıe-mınıstri Ermek Alpysov "Aýyl – el besigi" jobasy boıynsha qazir ulttyq ekonomıka mınıstrligi ákimshi ekenin atap ótti. Aıtýynsha, 6,5 myń eldi mekenniń ishinen keleshegi bar 1781 aýyl anyqtalǵan.
"Osy aptanyń sońyna deıin joba tizimin tolyǵymen aıaqtaımyz. Bıyl 30 mıllıard teńgege 500 jobany iske asyrý josparlanyp otyr... Qazir óńirlik standarttar júıesi ázirlengen, ol ádilet mınıstrliginde tirkeýde jatyr. Ákimder dál osy óńirlik standarttar negizinde jumys isteıdi", - dedi Alpysov.
Májilis tóraǵasy Nurlan Nyǵmatýlın vıe-mınıstrdiń jaýabyna qanaǵattanbady.
"Elbasy byltyr kúzde tapsyrma berdi. Búgin Qasym-Jomart Kemeluly ákimdermen jıyn ótkizip, óńirlerdegi ınfraqurylymdyq jobalarǵa basa nazar aýdardy. Al siz qazir memlekettik organdardyń bir qaǵazdy kelise almaı jatqanyn aıtyp otyrsyz. Biz qazir naýryz aıyndamyz, jarty jyl ótti. Nege kesheýildep jatyr?", - dep surady májilis spıkeri.
"Biz aımaqtardyń óńirlik standarttardy ustanǵanyn qalaımyz. Osy apta tolyǵymen tirkep, baǵdarlamany iske qosamyz", - dep sendirdi Alpysov.Biraq bul jaýap ta Nyǵmatýlınniń kóńilinen shyqpady.
"Ermek Amantaıuly, suraqty estip tursyz ba? Aqsha bólindi, depýtattar úsh jyldyq bıýdjetti bekitti. Aqsha bar, ákimder de, óńirler de daıyn. Problema nede? Bir japyraq qaǵazdy bir memlekettik organnan ekinshisine jetkizýge jarty jyl jumsaısyzdar?!... Ótken jyldyń sońyna deıin aıaqtaý týraly tapsyrma berildi. Naýryzda jumys bastalýy kerek bolatyn, óńirlerde tender ótkizilýi tıis edi. Al siz maǵan taǵy bir juma týraly áńgime aıtyp otyrsyz", - dep ashýlandy ol.
Alpysov baǵdarlamany kóp uzamaı bekitemiz dep sendirdi.
"Bekitpeı qaıda barasyz? Baryp turǵan jaýapsyzdyq bul, túsinesiz be?! Bulaı jumys isteýge bolmaıdy, Ermek Amantaıuly. Iske kirisińiz", - dep eskertý jasady Nyǵmatýlın.
