«سوتتالۋشى الىمبەكوۆانىڭ بۇرىن سوتتالماعانىن، جالعىزباستى ايەل ەكەنىن جانە جاقسى مىنەزدەمەلەرىن، سونداي-اق ەلىمىزدىڭ ونەر سالاسىنداعى قوعام قايراتكەر ەكەنىن، جابىرلەنۋشىنىڭ تاراپىنان سوتتالۋشىنىڭ بوستاندىقتا جۇرگەنىنە قارسى ەمەستىگىن ەسكەرۋ قاجەت. سونىمەن قاتار الىمبەكوۆا باس بوستاندىعىنان ايىرىلعان جاعدايدا، جابىرلەنۋشى نازاروۆاعا مۇلىكتىك سالىعىن وتەۋ ماسەلەسى ءوزىنىڭ وڭ شەشىمىن تاپپاۋى مۇمكىن ەكەنىن ەسكەرگەن ءجون. كورسەتىلگەن ءمان-جايلاردى ەسكەرە وتىرىپ، الىمبەكوۆاعا تاعايىندالعان باس بوستاندىعىنان ايىرۋ جازاسى تىم قاتاڭ دەپ سانايمىن»، - دەيدى پروكۋرور.
سوت وتىرىسىندا مەملەكەتتىك ايىپتاۋشى سوتتالۋشى گاۋھار الىمبەكوۆانى قر قك 190-بابى 3-بولىگىنە (الاياقتىق) سايكەس كىنالى دەپ تانىپ، 3 جىلعا باس بوستاندىعىن شەكتەۋ جازاسىن تاعايىنداۋدى سۇرادى.
ال، گاۋھار الىمبەكوۆانىڭ ادۆوكاتى بۇعان دەيىن كەسىلگەن ۇكىمدى نەگىزسىز دەپ سانايدى. سوتتا ءسوز سويلەگەن شىنقۋات بايجانوۆ الىمبەكوۆانىڭ دا الاياق ورداباەۆاعا الدانىپ قالعانىن مالىمدەدى. سونداي-اق، ول جابىرلەنۋشى باقىت نازاروۆامەن كەزدەسىپ، وعان انشىلەر جيناپ بەرگەن 8 ميلليون تەڭگەنى ۇسىنعانىن جوققا شىعارماي ايتتى، دەپ حابارلايدى Stan.kz اقپاراتتىق اگەنتتىگىنىڭ ءتىلشىسى سوت زالىنان.
"قىلمىستىق كودەكستىڭ 23-بابى بار. ەگەر ارەكەتتى جاساعان ادام ءوز ارەكەتتەرىنىڭ قوعامعا قاۋىپتىلىگىن ۇعىنباعان بولسا، ءىستىڭ ءمان-جايى بولسا ۇعىنا الماعان بولسا، قوعامعا تيگىزەر زارداپتارىن الدىن الا بولجاپ بىلمەگەن بولسا، ءىس-ارەكەت كىناسىزدىكپەن جاسالعان دەپ تانىلادى. مەن الىمبەكوۆانىڭ ارەكەتىن كىناسىزدىكپەن جاسالعان دەپ ەسەپتەيمىن", - دەدى ادۆوكات سوتتا.
شىنقۋات بايجانوۆتىڭ سوزىنە قاراعاندا، 2013 جىلى الىمبەكوۆا ورداباەۆانىڭ ارام پيعىلىن بىلمەگەن. تانىستارىنا پاتەر الىپ بەرۋ ءۇشىن 100 مىڭ اقش دوللارىن جيناپ بەرگەن.
"ورداباەۆا كەشەگى سوتتا ءوز كىناسىن مويىندامادى. نازاروۆا الىمبەكوۆانىڭ ءوزى سەكىلدى جابىرلەنۋشى ەكەنىن بىلەدى.
الىمبەكوۆا ءان ايتادى، اقشا تاۋىپ بەرەدى دەپ نازاروۆا ونىڭ ۇستىنەن ارىز جازعان.
نازاروۆا الىمبەكوۆانىڭ قىلمىسىن دالەلدەۋ وتە قيىن ەكەنىن ءبىلىپ، ونى 2 جىل بويى جازىپ جۇرگەن. الىمبەكوۆا بىلمەيدى، نازاروۆا قۇربىم دەپ ويلاپ جۇرگەن", - دەيدى ادۆوكات.
سوزىنە قاراعاندا، تەرگەۋشىلەر اۋديوجازبانىڭ زاڭسىز دالەلدەمە ەكەنىن ەسكەرمەستەن، وعان ساراپتاما جاساعان. ونى دالەل ەسەبىندە ءىس ماتەريالدارىنا قوسقان.
"ونى ايتپاسام دا بولار ەدى. بىراق سوت وسى اۋديوتاسپاعا سىلتەمە جاسايدى. مەن اۋديوتاسپانى تۇگەلدەي وقىپ شىقتىم. ءاربىر سوزىنە ءمان بەرىپ، زەرتتەپ قارادىم.
ونىڭ ىشىندە الىمبەكوۆانىڭ كىناسىن دالەلدەيتىن ەشقانداي ءسوز تابا المادىم. "كەشىر، مەن الداندىم، بىلمەي قالدىم" دەگەن سوزدەر جوق. كەرىسىنشە الىمبەكوۆا ءوزىنىڭ دە الدانىپ قالعانىن، ورداباەۆانىڭ ارام پيعىلىن بىلمەي قالعانىن قايتا-قايتا ايتىپ وتىرادى. بىراق ادامگەرشىلىگى كۇشتى، سەزىمتال. ونەر ادامدارىنىڭ ءبارى سونداي عوي. نازاروۆانى اياپ، ءوزى دە قاتتى باي ادام ەمەس. سوندا دا ءبىراز ۋاقىت بويى اقشا بەرىپ وتىرعان", - دەيدى بايجانوۆ.
"الىمبەكوۆا "مەنىڭ ەشقانداي كىنام جوق، بەرەتىن اقشام دا جوق. ەكىنشىدەن، ءوزىم الدانىپ قالعان اداممىن، اقشا بەرۋگە مىندەتتى ەمەسپىن" دەپ ايتتى. دەگەنمەن دە انشىلەر قاۋىمى اقشا جينادى. "جىگىتتەر" توبىنىڭ پروديۋسەرى، اقبوتا (رەد. كەرىمبەكوۆا) دەيتىن ءانشى بار. سول ەكەۋى قولقا سالعاننان كەيىن كافەدە كەزدەستىك. ارعى جاعىندا نازاروۆا ادۆوكاتپەن وتىردى، بەرگى جاعىندا ءبىز ۇشەۋمىز وتىردىق.
كىناسى بولماسا دا، 8 ميلليوندى الىڭىز دا، اقشانى الدىم دەپ جازباي-اق قويىڭىز، بىراق باسقا ەشقانداي تالاپ-تىلەگىم جوق دەپ جازىڭىز دەدىم. قالعان اقشانى ورداباەۆادان ءوندىرىپ الاسىز دەدىم. ول كىسى "جوق، ماعان 16 ميلليونداي اقشا بەر" دەدى", - دەيدى شىنقۋات بايجانوۆ.
ءسوز سوڭىندا ادۆوكات 2019 جىلدىڭ 30 قاڭتارىندا قابىلدانعان ۇكىمدى زاڭسىز دەپ تانۋدى، ءانشى گاۋھار الىمبەكوۆاعا قاتىستى اقتاۋ ۇكىمىن شىعارۋدى سۇرادى.
Stan.kz
