Abaı oblysyndaǵy jaǵdaı turaqtalǵanymen, jel turyp, buǵan deıin sóndirilgen oshaqtar qaıtadan kúsheıip, jana bastaǵan. Bul týraly jýrnalıst Ońǵar Alpysbaıuly “Adyrna” ulttyq portalyna aıtyp berdi.
Keshegiden jaǵdaı turaqty. 8 oshaqty órt sóndirý jumystary júrgizilip jatyr. Tik ushaqpen joǵarydan qaraǵan kezde órtenip jatqan jerler qorqynyshty. Búgin biz órt bolyp jatyrǵan birneshe jerge baryp kórdik.
Tótenshe jaǵdaılar qyzmetkerlerine eń qıyny - qalyń órtten qatty jalyn men ystyq soǵyp turady. Ol jerde jaı júrýdiń, demalýdyń ózi qıyn. Qyzmetkerler sondaı jaǵdaıda jumys istep jatyr. Eger qatty tunshyǵyp bara jatyrsa ózderiniń tásilderi bar eken. Betterine sýly oramal nemese sýlanǵan kez kelgen shúberek basyp, eńkeıip, jerge jaqyndap tynystap, aýa jutyp alady. Biraq uzaq demalyp otyratyn ýaqyttary da joq. Tamaqtaryn sol jaqqa alyp kelip jatyr, - dep qyzmetkerlerdiń jaǵdaıyn aıtty.
Aıtýynsha, turǵyndardyń barlyǵy jumyla kúsh salýda. Oqıǵa bolǵan jerge kómek qolyn sozamyn degender aǵylyp jatyr eken.
Eń qýantarlyǵy - bizdiń halqymyzdyń uıymshyldyǵy. Sebebi, mynda tamaqtandyrý pýnkteri ornalasqan. Ol jerge osy mańaıda ornalasqan aýyldardyń áıel eriktileri kelip, kúnine 10 shaqty qazan tamaq pisiredi. Sol jaqta júrgen qyzmetkerlerge tamaqtardy kóliktermen jiberip jatyr. Odan bólek, birneshe kólikke tıelgen azyq-túlik, sý, ózge de qajetti zattardyń barlyǵy lek-legimen kelip jatyr.
Dál qazirgi ýaqytta 1500-ge jýyq adam, 300-ge jýyq tehnıka, 11 tikushaq órt sóndirý jumystarymen aınalysýda. Búgin tańerteń de Jetisý, Almaty oblystarynan qosymsha kúsh kelgen. Aqparat boıynsha, 1000 adam degen, - dedi jýrnalıst.
Ońǵar Alpysbaıuly oqıǵa ornynda qaza tapqandardyń otbasymen de sóıleskenin aıtty.
Eń qorqynyshtysy - bul jerden 14 adamnyń máıti tabyldy. Orman sharýashylyǵynyń qyzmetkerleriniń barlyǵy órtenip ketken. Jańa sol kisilerdiń týystarymen sóılestik.
Ormannyń ishinen 2 adam shyqqan eken. Eki adam dep estidik, biraq ekinshisin naqtylaı almadyq. Al bireýiniń ákesimen sóılestik. Onyń ózi áli de sol órt sóndirý jumystaryna qatysyp júr eken. Onyń aıtýy boıynsha, ol jigitke órtke jaqyndaýǵa ruqsat bermegen. Kózine jas alyp turyp, aıtyp berdi.
“Qashyp shyqqan adamnyń ákesi bizdiń tanystarymyz edi, jaqsy aralasqan adamdarymyz edi. Túngi saǵat 10-kezinde shamamen baılanysqa shyqty raııamen: “Bizdi tastamańyzdar! Biz áli de osyndamyz. Bizdi órt qorshap aldy”, dep baılanysqa shyǵyp, sońǵy sózderi sol boldy”, -deıdi.
Odan keıin olarǵa baryp jetý, qutqaryp alý múmkin bolmaǵan. Ókinishke qaraı, olardyń máıitteri, tehnıkasy de keshe tabyldy. Týystary qan jutyp, qaıǵyryp otyr. Jaǵdaı shamamen osyndaı, - dedi jýrnalıst.
Sondaı-aq, oblystyq óńirde jel kúsheıip ketken. Buǵan deıin sóndirilgen oshaqtar qaıtadan kóterilip, qaıtadan jana bastady.
Jel kúsheıgen jerlerdiń birnesheýin baryp kórdik. Mynaý jel saǵat saıyn baǵytyn aýystyryp, órt túrli baǵytta taralyp jatyr. Onyń barlyǵyn tik ushaqpen joǵarydan barlap, qaı baǵytta dál qazir janyp jatyrǵanyn, qaı jerde qatty janyp jatyrǵanyn jáne qaı jerge qansha kúsh jiberý kerek ekenin anyqtap otyr. Ázirge osy”,-dep oqıǵa bolǵan jerden Ońǵar Alpysbaıuly habar berdi.
