التاي كولگىنوۆ مەملەكەت باسشىسىنا العىس ايتىپ، ۇكىمەت باسشىسىنىڭ ورىنباسارى جانە ەلوردا اكىمدىگىن باسقارىپ تۇرعاندا اتقارىلعان جۇمىستارمەن تانىستىردى، دەپ حابارلايدى "ادىرنا" ۇلتتىق پورتالى قازاقپاراتقا سىلتەمە كورسەتە وتىرىپ.
«ۇكىمەتتە جۇمىس ىستەۋ، اسىرەسە، الەۋمەتتىك سالاعا باسشىلىق جاساۋ مەن ءۇشىن ۇلكەن مارتەبە بولعانىن ايتقىم كەلەدى. بۇل – ماڭىزدى ءارى نازىك سالالاردىڭ ءبىرى. مەملەكەت باسشىسى قاسىم-جومارت كەمەلۇلى توقاەۆتىڭ تاپسىرماسىمەن «اۋىلدىق دەنساۋلىق ساقتاۋدى جاڭعىرتۋ»، «جايلى مەكتەپ»، «اۋىل اماناتى» جانە تاعى باسقا مەملەكەتتىك باعدارلامالاردى جۇزەگە اسىرۋ باستالدى. جاۋاپتى مينيسترلىكتەر جۇمىسىن باستادى. ماسەلەن، «اۋىل دەنساۋلىق ساقتاۋ سالاسىن جاڭعىرتۋ» جوباسى 3 جىل ىشىندە 600-دەن استام مەديتسينالىق نىساندى سالۋ ارقىلى اۋىل تۇرعىندارىن جەدەل ءارى ساپالى مەديتسينالىق كومەكپەن قامتاماسىز ەتەدى»، - دەپ جازدى التاي كولگىنوۆ Facebook پاراقشاسىندا.
سونداي-اق، ۇكىمەت باسشىسىنىڭ بۇرىنعى ورىنباسارى رەسپۋبلكالىق «جايلى مەكتەپ»، «اۋىل اماناتى» باعدارلامالارىنىڭ جۇزەگە اسىرىلۋ بارىسىنا توقتالىپ ءوتتى.
«وتاندىق جوعارى وقۋ ورىندارىنىڭ باسەكەگە قابىلەتىن ارتتىرۋ ماقساتىندا شەتەلدىك جەتەكشى جوو-مەن ارىپتەستىك بايلانىستاردى جۇزەگە اسىرۋ جۇمىستارى باستالدى. ستۋدەنتتەرگە جاتاقحانالار سانىن كوبەيتۋ جۇمىستارى دا جۇرگىزىلىپ جاتىر.حالىقتىڭ تابىسىن ارتتىرۋ باعدارلاماسى، سونداي-اق مادەنيەت، سپورت، تۋريزم، جاستار ساياساتى جانە ت.ب. قاتىستى جاڭا تۇجىرىمدامالار قولعا الىندى. جىل باسىنان بەرى ەلىمىزدىڭ 20 ءوڭىرىنىڭ ءبارىن ارالاپ، تۇرعىندارمەن كەزدەستىم. سول جۇزدەسۋلەر بارىسىندا اكىمدىكتەرمەن بىرلەسە جۇمىس جوسپارى جاسالىپ، قازىردىڭ وزىندە قارقىندى تۇردە جۇزەگە اسىرىلا باستادى»، - دەيدى ول.
ودان ءارى ەلوردانىڭ ەكس-اكىمى استانالىقتاردى ءجيى مازالايتىن ماسەلەلەردى قوزعاپ، اتقارىلعان جۇمىستار بويىنشا ەسەپ بەردى.
«استانا – حالىق سانىنىڭ ءوسۋ قارقىنى جوعارى ءارى ەڭ جىلدام دامىعان قالا. بۇل جەرگە جۇمىسقا كەلگەنىمدە باستى ماسەلەلەردىڭ ءبىرى – ۇلەسكەرلەردىڭ ماسەلەلەرىن شەشۋ بولدى. ونداعان جىلدان بەرى پاتەر كەزەگىندە تۇرعان 16 مىڭعا جۋىق ۇلەسكەر وتباسىنىڭ 80 پايىزدان استامىنىڭ ماسەلەسى شەشىلدى. سونداي-اق ءبىز الەۋمەتتىك نىسانداردىڭ سانىن ايتارلىقتاي ارتتىردىق. اتاپ ايتقاندا 36 مەكتەپ پايدالانۋعا بەرىلدى. تاعى 9 مەكتەپ اياقتالۋ كەزەڭىندە. ناتيجەسىندە ەكى اۋىسىممەن بارلىعى 93 مىڭ وقۋشىعا جاڭا ورىن. ءبىز 20 مىڭنان استام الەۋمەتتىك پاتەر، 900-گە جۋىق اۋلالار مەن قوعامدىق ورىنداردى سالدىق.
ەلوردانىڭ ءاربىر ءتورتىنشى تۇرعىنى تۇرعىن ءۇي الاپتارىندا تۇراتىنىن ەسكەرە وتىرىپ، تۇرعىن ءۇي الاپتارىن دامىتۋدىڭ جەكە جوسپارى جاسالدى. ەلدى مەكەندەردە 700 شاقىرىمعا جۋىق گاز قۇبىرى، 42 شاقىرىم سۋ قۇبىرى، 17 شاقىرىم جاڭبىر سۋى، 11 شاقىرىم كارىز جەلىسى، 250 كوشە جانە ۇلى دالا داڭعىلىنىڭ بويىنداعى كوپىر قۇرىلىسى دا اياقتالدى. قالادا 400-دەن استام جاڭا كوشە سالىنىپ، جوندەلدى. تاۋەلسىزدىك داڭعىلىنىڭ بويىندا كوپىر سالۋ جۇمىستارى باستالدى.
بۇرىن جاڭبىر جاۋسا استانا كوشەلەرىن سۋ باسىپ كەتەتىن. سول جۇمىستارمەن جۇيەلى اينالىستىق. 146 ۋچاسكەدە سۋ باسۋ ماسەلەسى شەشىلدى. ول ءۇشىن 130 شاقىرىمنان استام جاۋىن-شاشىن كاناليزاتسياسى مەن ارىق جۇيەسى سالىندى. مىسالى، سۋ تاسقىنى ماسەلەسى ەڭ پروبلەمالى جەردىڭ ءبىرى – ب.مومىشۇلى داڭعىلى ەدى. بۇل ۋچاسكەنى قالا تۇرعىندارى قالجىڭداپ ۆەنەتسيامەن سالىستىراتىن ەدى.
سونداي-اق، جاستار ىقشام اۋدانىندا (تاشەنوۆ پەن اممان كوشەلەرىنىڭ قيىلىسى) تازارتۋ قوندىرعىسى سالىنىپ، كوشەنى سۋ باسۋ ماسەلەسىن شەشۋگە مۇمكىندىك بەردى. تاشەنوۆ، باراەۆ، ءۋاليحانوۆ، پۋشكين، يمانباەۆا كوشەلەرى، رەسپۋبليكا جانە تاۋەلسىزدىك داڭعىلدارىنىڭ جوعارعى بولىگى; سونداي-اق باسقا دا بىرقاتار نوسەر كارىزدەرى مەن تازارتۋ قۇرىلىستارى سالىندى.
ۇكىمەت 2020 جىلدان باستاپ اكىمدىككە جىل سايىن كەمىندە 3 ميلليون شارشى مەتر تۇرعىن ءۇي سالۋ مىندەتىن قويدى. ءبىز بۇل جوسپاردى ورىندادىق. بىراق 2022 جىلدىڭ باسىندا اكىمدىكتىڭ باستاماسىمەن قۇرىلىس قارقىنىن تومەندەتۋ ۇسىنىلدى.
حالىق سانىنىڭ قارقىندى ءوسۋىن ەسكەرگەن اكىمدىك تۇرمىسقا قاجەتتى جۇيەلەردى سالۋعا كىرىستى.
وسى ماسەلەلەردى ەسكەرىپ، 2020 جىلى جاڭا اۋىز سۋ ستانتسياسى (نفس-3) جوبالانىپ، 2021 جىلى قۇرىلىسى باستالدى. وسى ايدا اكىمدىك نفس-3 قۇرىلىسىن اياقتاۋدى جوسپارلاپ وتىر. سونىمەن قاتار، كەشە استانا سۋ قويماسىنان سۋ وتكىزەتىن قۇبىردىڭ جاڭا تارماعى ىسكە قوسىلدى. 2022 جىلى ۇزاق مەرزىمدى قۇرىلىس نىسانى جەو-3 قۇرىلىسى قايتا جانداندى.
سونداي-اق 2022 جىلى گازبەن جۇمىس ىستەيتىن ەكى جىلۋ ەلەكتر ستانتسياسىنىڭ قۇرىلىسى باستالدى. ولار وسى جىلىتۋ ماۋسىمىندا اياقتالۋى ءتيىس.
«بۇل – تۇرعىنداردىڭ يگىلىگى ءۇشىن اتقارىلعان جۇمىستار مەن ۇلكەن ۇجىمنىڭ اتقارعان وراسان ەڭبەگىنىڭ ءبىر بولىگى عانا. مۇنىڭ ءبارى مەملەكەت باسشىسىنىڭ ۇلكەن قولداۋىنىڭ ارقاسىندا مۇمكىن بولدى. سوندىقتان زور سەنىم ءۇشىن شىن جۇرەكتەن العىس ايتامىن!»، - دەپ قورىتىندىلادى ا. كولگىنوۆ.
ەسكە سالا كەتەيىك، 8 ماۋسىم كۇنى مەملەكەت باسشىسىنىڭ جارلىعىمەن التاي كولگىنوۆ قازاقستان رەسپۋبليكاسى پرەمەر-ءمينيسترىنىڭ ورىنباسارى لاۋازىمىنان بوساتىلدى.
"ادىرنا" ۇلتتىق پورتالى
