اقمولا وبلىسىنىڭ اكىمى ەرمەك مارجىقپاەۆ ءباسپاسوز ءماسليحاتىندا قاڭعىباس يتتەر مەن مىسىقتار ماسەلەسىنىڭ قالاي شەشىلىپ جاتقانىن ايتتى. اكىمنىڭ ايتۋىنشا، اقمولا وڭىرىندە ءۇي-كۇيسىز يتتەرگە ارنايى پاناجاي سالىناتىن بولادى، دەپ حابارلايدى "ادىرنا" ۇلتتىق پورتالى.
اكىم ءوز سوزىندە بۇرالقى يتتەر مەن مىسىقتار پروبلەماسىن شەشۋگە 100 ميلليون تەڭگە بولىنگەنىن ايتتى. ولارعا ارنايى پاناجايلار سالىنباق.
- راسىندا دا بىزدە قاڭعىباس يتتەر مەن مىسىقتار پروبلەماسى بار. مەملەكەت باسشىسىنىڭ ءساۋىر ايىندا ۇكىمەتتىڭ كەڭەيتىلگەن وتىرىسىندا وسى ماسەلەگە ەرەكشە نازار اۋدارعانى كەزدەيسوق ەمەس. وتكەن جىلدىڭ ناۋرىز ايىندا «جانۋارلارعا جاۋاپكەرشىلىكپەن قاراۋ تۋرالى» زاڭ قابىلداعاندا ءبىزدىڭ ەكولوگتار، زووتەحنيكتەر جەڭىسكە جەتتى. سودان باستاپ كوپ نارسە وزگەردى، جانۋارلارعا دەگەن كوزقاراس وزگەردى. قازىر ءبىزدىڭ ۆەتەرينارلىق ستانتسيالار يت-مىسىقتى اۋلاي المايدى، اتا المايدى. مۇندا چيپتەۋ، پاناجايلاردا ۇستاۋ سەكىلدى ارنايى الگوريتمى بار. بۇعان ءبىز شامامەن 100 ملن تەڭگە بولدىك. وتكەن جىلى 10 ملن تەڭگە بولىنگەن ەدى. ياعني، بولىنەتىن قاراجاتتى 10 ەسەگە ۇلعايتتىق، - دەدى ە. مارجىقپاەۆ ورتالىق كوممۋنيكاتسيالار قىزمەتىندە.
سونىمەن بىرگە وبلىس اكىمى وڭىردە قاڭعىباس يتتەرگە ارنايى سالىناتىنىن پاناجاي جايىن ايتىپ، ءىس بارىسىن ءتۇسىندىردى.
- ءبىز بەس نەگىزگى اۋداندا جەر ۋچاسكەلەرىن بولدىك. ەلوردا ماڭىنان ءبىر پاناجايعا ورىن تابىلدى. وبلىس ورتالىعىنىڭ جانىنان دا سولاي اشامىز. بۇل ماسەلەنى ۇنەمى ەرەكشە باقىلاۋدا ۇستايمىز. بەس ايدا 1650 يت ۇستالدى، ءبىز وسى الگوريتم بويىنشا جۇمىس ىستەپ كەلەمىز. پاناجاي بويىنشا كونكۋرستا جەڭىسكە جەتكەن كومپانيالار بار. ولار جوعارىدا ايتىلعان الگوريتم بويىنشا اينالىساتىن بولادى، - دەدى ەرمەك مارجىقپاەۆ.
"ادىرنا" ۇلتتىق پورتالى
