قازاقستاننىڭ ەكىنشى پرەزيدەنتى قاسىم-جومارت توقاەۆ قىزمەتىنە كىرىستى

1976
Adyrna.kz Telegram

بۇگىن، 20 ناۋرىزدا استانادا پارلامەنتتىڭ بىرلەسكەن وتىرىسىندا قاسىم-جومارت توقاەۆ سالتاناتتى تۇردە انت بەردى.

20 ناۋرىز تۇسكى ساعات 12:00-دە باستالعان انت بەرۋ راسىمىنە پارلامەنت دەپۋتاتتارى، ۇكىمەت مۇشەلەرى، بيلىكتىڭ وزگە دە تارماق وكىلدەرىنەن بولەك ەلدىڭ تۇڭعىش پرەزيدەنتى نۇرسۇلتان نازارباەۆ قاتىستى. ونى پارلامەنت دەپۋتاتتارى ورىندارىنان تۇرىپ، ۇزاق شاپالاقتاپ قارسى الدى.

وسىدان سوڭ قازاقستان پارلامەنتى سەناتىنىڭ توراعاسى قىزمەتىن اتقارعان قاسىم-جومارت توقاەۆ كەلدى. انت بەرۋ ءراسىمى الدىندا كونستيتۋتسيالىق كەڭەس توراعاسى قايرات ءمامي اتا زاڭنىڭ 42-بابىنا سايكەس، توقاەۆتىڭ انت بەرگەن ساتىنەن باستاپ پرەزيدەنت قىزمەتىنە كىرىسەتىنىن ايتتى. بۇدان كەيىن قاسىم-جومارت توقاەۆ سالتاناتتى تۇردە انت بەردى.

"قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ كونستيتۋتسياسى مەن زاڭدارىن قاتاڭ ساقتاۋعا، ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە، قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن" دەدى توقاەۆ.

ەل كونستيتۋتسياسىنىڭ 48-بابىنىڭ 1-تارماعىنا سايكەس، قازاقستان پرەزيدەنتىنىڭ وكىلەتى مەرزىمىنەن بۇرىن توقتاتىلعان جاعدايدا ونىڭ وكىلەتى پارلامەنت سەناتىنىڭ توراعاسىنا كوشەدى. ول بۇل قىزمەتتى جاڭا پرەزيدەنت سايلانعانعا دەيىن اتقارادى.

قازاقستان كونستيتۋتسياسىنا سايكەس، ناقتى جاعدايدا ەل پرەزيدەنتى وكىلەتىن العان قاسىم-جومارت توقاەۆ سەنات توراعاسى قىزمەتىنەن بوساتىلادى.

انت بەرگەننەن كەيىن ءسوز العان قازاقستاننىڭ پرەزيدەنتى قاسىم-جومارت توقاەۆ نۇرسۇلتان نازارباەۆتىڭ "مەملەكەت ءۇشىن سىڭىرگەن ەڭبەگىن" اتاپ ءوتىپ، مەملەكەت استاناسىنا تۇڭعىش پرەزيدەنت نۇرسۇلتان نازارباەۆتىڭ ەسىمىن بەرۋدى ۇسىندى.

"قازاقستان استاناسىن نۇرسۇلتان دەپ اتاۋدى ۇسىنامىن" دەدى ول.

ەلدىڭ تۇڭعىش پرەزيدەنتى نۇرسۇلتان نازارباەۆ جانە قازاقستان پرەزيدەنتى قاسىم-جومارت توقاەۆ. استانا، 20 ناۋرىز 2019 جىل.
ەلدىڭ تۇڭعىش پرەزيدەنتى نۇرسۇلتان نازارباەۆ جانە قازاقستان پرەزيدەنتى قاسىم-جومارت توقاەۆ. استانا، 20 ناۋرىز 2019 جىل.

بۇعان قوسا توقاەۆ تۇڭعىش پرەزيدەنتتىڭ قۇرمەتىنە ەل استاناسىندا مونۋمەنت ورناتۋدى، "بارلىق وبلىستارداعى باستى كوشەلەرگە نۇرسۇلتان نازارباەۆتىڭ اتىن بەرۋ تۋرالى" ۇسىنىس ايتتى.

پرەزيدەنت قىزمەتىنە كىرىسكەن توقاەۆ العاشقى جارلىعىمەن نۇرسۇلتان نازارباەۆقا "حالىق قاھارمانى" اتاعىن بەرىپ، "التىن قىران" وردەنىن تاپسىردى. ول نۇرسۇلتان نازارباەۆتى "ساياسي ۇستازىم" دەپ اتاپ، العىس ءبىلدىردى. ول ءسوز اراسىندا ەلدەگى بيلىكتىڭ "قاقتىعىسسىز بەيبىت جولمەن اۋىسىپ جاتقانىن" اتاپ ءوتتى.

19 ناۋرىزدا قازاقستان پرەزيدەنتى نۇرسۇلتان نازارباەۆ رەسپۋبليكالىق تەلەارنالاردان حالىققا ۇندەۋ جاساپ، پرەزيدەنتتىك وكىلەتىن توقتاتاتىنىن مءالىمدەدى.

نازارباەۆ ۇندەۋ جاساپ جاتقاندا قول قويعان "قازاقستان رەسپۋبليكاسى پرەزيدەنتىنىڭ وكىلەتىن اتقارۋ تۋرالى" جارلىققا سايكەس، ونىڭ پرەزيدەنتتىك وكىلەتى 20 ناۋرىزدا توقتاتىلدى.

65 جاستاعى قاسىم-جومارت توقاەۆ 90-شى جىلداردىڭ سوڭى 2000-ءشى جىلدار باسىندا قازاقستاننىڭ سىرتقى ىستەر ءمينيسترى، پرەمەر-ءمينيسترى بولدى. جەنەۆاداعى بۇۇ وكىلدىگىندە ءتۇرلى قىزمەت اتقاردى. قازاق، ورىس، اعىلشىن جانە قىتاي تىلدەرىندە سويلەيدى.

قاسىم-جومارت توقاەۆ كىم؟ (19.03.2019 جىل).

اقش جانە ەۋرووداق رەاكتسياسى

اقش مەملەكەتتىك دەپارتامەنتى 19 ناۋرىزدا اقش-تىڭ قازاقستانمەن "تۇراقتى" بايلانىسى نازارباەۆ وتستاۆكاسىنان كەيىن دە جالعاسا بەرەدى دەپ مالىمدەدى. "اقش جانە قازاقستان تىعىز ەكىجاقتى قارىم-قاتىناستى قولدايدى، وعان وتكەن جىلى پرەزيدەنت [دونالد] ترامپ پەن پرەزيدەنت نازارباەۆتىڭ تاريحي كەزدەسۋى دالەل. بۇل يمپۋلس ءارى قاراي دا جالعاسا بەرەدى دەپ كۇتەمىز" دەدى اقش مەملەكەتتىك دەپارتامەنت وكىلى سەيسەنبى كۇنى.

نۇرسۇلتان نازارباەۆ 2018 جىلى قاڭتار ايىندا اقش-قا رەسمي ساپارمەن بارعان. اقش-تاعى كەزدەسۋلەر نەگىزىنەن ايماق قاۋىپسىزدىگى، ەكونوميكالىق ماسەلەلەر جانە ەكىجاقتى قارىم-قاتىناستى دامىتۋعا ارنالعان.

ەۋروپا وداعىنىڭ (ەو) سىرتقى ساياسات جونىندەگى جوعارعى وكىلى فەدەريكا موگەريني نازارباەۆتىڭ "رەفورما جۇرگىزۋ" جانە "ايماقتىق، الەمدىك دەڭگەيدە بەيبىتشىلىك، تۇراقتىلىق جانە قاۋىپسىزدىككە ەرەكشە باعىتتالعان ارىپتەستىكتى دامىتۋداعى ماڭىزدى ءرولىن" جوعارى اتاپ وتكەن.

ء"بىز اۋىسۋدىڭ قازاقستان كونستيتۋتسياسىنا سايكەس بىرقالىپتى وتكەنىن قالايمىز" دەدى ءباسپاسوز حاتشىسى مايا كوسيانچيچ.

قازاقستان پرەزيدەنتىنىڭ ءباسپاسوز قىزمەتى نازارباەۆتىڭ پرەزيدەنت وكىلەتىن توقتاتاتىنى جايلى شەشىمدى رەسەي پرەزيدەنتى ۆلاديمير پۋتينمەن تالقىلاعانىن حابارلاپ، ەكى ەل جەتەكشىلەرىنىڭ "بولاشاقتا تۇراقتى بايلانىستى جالعاستىرۋ تۋرالى" كەلىسكەنىن مالىمدەدى.

"ادىرنا" ۇلتتىق پورتالى

پىكىرلەر