«ديكي ارمان» لاقاپ اتىمەن تانىمال ارمان جۇماگەلديەۆتى قاماۋدا ۇستاۋ مەرزىمى تاعى ۇزارتىلدى. بۇل تۋرالى الماتىداعى مامانداندىرىلعان اۋدانارالىق تەرگەۋ سوتى ايتتى، دەپ حابارلايدى «ادىرنا» ءتىلشىسى.
«2023 جىلعى 5 ماۋسىمدا سوت قاۋلىسىمەن سوتالدى تەرگەۋ ورگانىنىڭ ءوتىنىشحاتى قاناعاتتاندىرىلدى جانە د.-عا قاتىستى قىلمىستىق ءىس ماتەريالدارىن قاراۋ كەزىندە قاماۋدا ۇستاۋ مەرزىمىن ەكى ايعا دەيىن، ياعني 2023 جىلعى 7 تامىزعا دەيىن ۇزارتۋعا سانكتسيا بەرىلدى»،—دەلىنگەن حابارلامادا.
ايتا كەتەيىك، 2022 جىلدىڭ 7 قاڭتارىندا ىشكى ىستەر مينيسترلىگى الماتىدا كريمينالدىق اۆتوريتەت - جابايى ارماننىڭ ۇستالعانىن مالىمدەگەن ەدى. ول قاڭتاردا جاپپاي تارتىپسىزدىكتەردى ۇيىمداستىردى جانە قارۋ-جاراقتى زاڭسىز ساقتادى دەپ ايىپتالىپ وتىر.