قازاقستاننىڭ بىرنەشە وڭىرىندە پوليتسەيلەر پارا الدى دەگەن كۇدىككە ءىلىندى. قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ وكىلدەرى قىلمىستىق ىستەردىڭ ءمان-جايىن اشىپ ايتتى، - دەپ حابارلايدى Tengrinews.kz تىلشىسى.
"جامبىل وبلىسىندا تالاس اۋداندىق پوليتسيا ءبولىمى باسشىسىنىڭ ورىنباسارى، پوليتسيا مايورى، ءبولىم تەرگەۋشىسى، پوليتسيا كاپيتانى ۇستالدى. ولار قىلمىستىق جولمەن تابىلعان مۇلىكتى ساتىپ الۋ دەرەگى بويىنشا قىلمىستىق ءىستى توقتاتقانى ءۇشىن ازاماتتان 300 مىڭ تەڭگە كولەمىندە پارا الدى دەگەن كۇدىككە ءىلىندى", - دەدى بريفينگتە سىبايلاس جەمقورلىققا قارسى ىس-قيمىل ۇلتتىق بيۋرو باسشىسىنىڭ ورىنباسارى شىڭعىس قابدۋلا. ونىڭ ايتۋىنشا، قازىر ولار قاماۋعا الىنعان جانە تەرگەۋ جالعاسىپ جاتىر ەكەن.
"سوتقا دەيىنگى تەرگەۋ شارالارىن توقتاتقانى ءۇشىن 900 مىڭ تەڭگە پارا العان الماتى انىقتاۋ باسقارماسىنىڭ تەرگەۋشىسى، اعا لەيتەنانتقا قاتىستى سوتقا دەيىنگى تەرگەۋ جۇرگىزىىپ جاتىر. وعان قاتىستى قر قىلمىستىق كودەكسىنىڭ 309-بابى ("جەزوكشەلiكپەن اينالىسۋعا ارنالعان پريتوندار ۇيىمداستىرۋ نەمەسە ولاردى ۇستاۋ جانە جەڭگەتايلىق") بويىنشا ايىپ تاعىلعان", - دەدى قابدۋلا. تەرگەۋشى ءۇي قاماققا الىندى.
شىڭعىس قابدۋلانىڭ ايتۋىنشا، پاۆلودار وبلىسىندا استانا قالالىق ۇقكب پوليتسيا مايورىنا قاتىستى سوتقا دەيىنگى تەرگەۋ جۇرگىزىلىپ جاتىر ەكەن. "ول وسىعان دەيىن وبلىستىق ءىىد كريمينالدىق پوليتسيا ءبولىمىنىڭ باسشىسى لاۋازىمىندا جۇمىس ىستەپ، ءبىر توپ تۇلعالار ارقىلى جالپى قامقورلىعى مەن قىلمىستىق جاۋاپكەرشىلىككە تارتپاعانى ءۇشىن جشس قۇرىلتايشىسىنان بۇرىن كەلىسىلگەن 4 ميلليون تەڭگەنىڭ 700 مىڭ تەڭگەسىن پارا رەتىندە الدى دەگەن كۇدىككە ىلىكتى", - دەدى قابدۋلا. پوليتسەي ءۇي قاماققا الىندى.
پەتروپاۆلداعى پاترۋلدىك پوليتسيا باتالونىنىڭ تاعى ءۇش پوليتسەيى جول ەرەجەسىن بۇزعان كەزدە حاتتاما تولتىرماعانى ءۇشىن ازاماتتاردان 2-دەن 20 مىڭ تەڭگەگە دەيىنگى كولەمدە پارا الدى دەگەن كۇدىككە ىلىكتى. قابدۋلانىڭ ايتۋىنشا، سونىمەن قاتار سوتقا دەيىنگى تەرگەۋ جوعارىدا اتالعان پوليتسيا قىزمەتكەرلەرىنە پارا بەرگەن 13 جەكە تۇلعاعا قاتىستى ءىس قوزعالدى. ءىس جۇرگىزۋ ۇستاۋلارى كىناسىن تولىق مويىنداۋعا بايلانىستى قولدانىلعان جوق.
الماتى وبلىسىنىڭ ۇيعىر پوليتسيا ءبولىمىنىڭ كامەلەتكە تولماعاندار ىستەرى جونىندەگى ينسپەكتورىنا قاتىستى سوتقا دەيىنگى تەرگەۋ جۇرگىزىلىپ جاتىر. ونى ۇيعىر اۋدانى قىرعىزساي اۋىلىنداعى مال ۇرلىعىنا قاتىسى بار دەگەن كۇدىكپەن ۇستالعان دەپ ايىپ تاعىلعان. پوليتسەي ءۇي قاماۋىندا. "ماڭعىستاۋ وبلىسىندا مۇنايلى اۋداندىق ءبولىمىنىڭ ۋچاسكەلىك پوليتسيا ينسپەكتورى پارا العانى انىقتالدى. ول جەكە كاسىپكەردەن كوشى-قون زاڭناماسىن بۇزعانى جانە قامقورلىعى بويىنشا جاۋاپكەرشىلىككە تارتىلماعانى ءۇشىن 135 مىڭ تەڭگە پارا الدى دەگەن كۇدىككە ءىلىندى", - دەدى ول.
