باياعىدا، حان كەنە ءوزىنىڭ وتارشىلدارعا قارسى كۇرەسى كەزىندە، وعان الىم - سالىق بەرمەي باس تارتقان قازاقتار بولىپتى. قوستاناي ءوڭىرىنىڭ قازاقتارى حان جىبەرگەن ناۋاشقا قارسى شىعىپ وندا قىرعىن بولعان ەكەن. ونى تاريحتا ءبارى بىلەدى.
كەنەكەم، "بۇل قازاقتى قالاي بىرىكتىرەمىن، قالاي مەملەكەت بولامىز" دەپ وڭتۇستىگىندە قوقانمەن الىسىپ، تەرىستىكتە ورىسپەن جاعالاسىپ جۇرگەن جولبارىس قوي. وعان قاراجات كەرەك، قارۋ كەرەك، كومەك كەرەك. الايدا، ونى ول كەزدە بارشا قازاق تۇسىنبەپتى. سول قازاقتار ءالى كۇنگە شەيىن، "كەنەسارى بۇرىن بۇيتكەن، سۇيتكەن، تىشقاق لاعىمىزدى تارتىپ العان، بالعوجانىڭ اتىن الىپ كەتتى، ەسەنەيدىڭ تۇيەسىن توڭقارىپ كەتتى" دەپ كۇڭكىلدەپ اڭگىمە ايتادى.
سول قازاق انا قىتايداعى وسپاندى دا سونداي قىلادى. "وسپان ءبۇيتتى - ءسۇيتتى" دەپ.
كەنە دە، وسپان دا سوعىس جىلدارى كۇللى قازاقتىڭ جاردەمىنە مۇقتاج بولعان قولباسىلار، ولار يدەيانىڭ ادامدارى، ولارعا نە ىستەسە دە جاراسادى.
ال ەندى سول قازاق كەيىن قايتتى دەيسىزدەر عوي. سول مالدارىن تارتىپ الىپ وزدەرىن قويداي قىرعان (1929 - 1933 ج) بولشەۆيكتەر ءۇشىن مايدانعا ءوز ەركىمەن (1941 ج) اتتانىپ، قولىنداعى بارىن سول جاققا جىرىپ بەرگەن ەكەن. ء"بىر ءتۇيىر ءدانىمىز جاۋدىڭ ماڭدايىنا وق بولىپ قادالسىن" دەپ، ءوزى اشقۇرساق بوپ جۇرسە دە ءدانىن دە، وعىن دا بەردى. سول سوعىستاعى ءۇش وقتىڭ ەكەۋى بىزدە جاسالدى. بۇگىندە، بىزدە سول سوعىسقا قاتىسقان قازاق - باتىر دا، مالدارىن تارتىپ العان بولشەۆيكتەر دە اۋليە، قالالارىمىزدا ءبىر - ءبىر كوشە اتىن يەمدەنىپ وتىر.
ال كەنە مەن وسپان قازاقتا ءالى "قاتىگەز", "جاۋىز", "بۇيتكەن - سۇيتكەن"...
P.S. قايران كەنەكەم مەن وشىڭ قازاقتان بۇنداي جاردەم كورسە باياعىدا ءوز مەملەكەتتەرىن قۇرىپ الاتىن ەدى. بۇنى تاعدىردىڭ تالكەگى دەسەك پە ەكەن..
ولجاس ءابىل
"ادىرنا" ۇلتتىق پورتالى
