«پسج» ساپىندا ونەر كورسەتەتىن شابۋىلشى ليونەل مەسسي پاريجدىك كلۋبپەن كەلىسىمشارتىن ۇزارتپايدى جانە اعىمداعى ماۋسىمنىڭ سوڭىندا ودان كەتەدى، - دەپ حابارلايدى "ادىرنا" پورتالى. بۇل تۋرالى جۋرناليست فابريتسيو رومانو Twitter-دە حابارلادى.
پسج باسشىلىعى كومانداعا 2021 جىلى قوسىلعان 35 جاستاعى فۋتبولشىمەن كەلىسىمشارتتى ۇزارتۋعا مۇددەلى ەكەنى بۇعان دەيىن بەلگىلى بولعان. الايدا تاراپتار كەلىسىمگە كەلە الماعاندىقتان، مەسسي بارسەلوناعا ورالۋى نەمەسە مانسابىن ساۋد ارابياسىندا جالعاستىرۋى ىقتيمال.
پسج ساپىندا فرانتسيا چەمپيونى اتانعان مەسسي جۇلدەلەر سانى بويىنشا داني الۆەستى قۋىپ جەتتى. ارگەنتينالىق ويىنشىنىڭ قازىر 43 جۇلدەسى بار، بولاشاقتا ول برازيليالىق ويىنشىنىڭ قازىرگى ۋاقىتتا جەڭىلمەيتىن رەكوردىن باسىپ وزۋى مۇمكىن.
"ادىرنا" ۇلتتىق پورتالى
