باۋىرجان مومىشۇلى اتىنداعى الماتى رەسپۋبليكالىق«جاس ۇلان» مەكتەبى ءوزىنىڭ 40 جىلدىق مەرەيتويىن اتاپ ءوتتى

1868
Adyrna.kz Telegram

1983 جىلى نەگىزى قالانعان ءبىلىم وشاعىنا 1991 جىلى مينيسترلىك كابينەتىنىڭ بۇيرىعىمەن كەڭەس وداعىنىڭ باتىرى باۋىرجان مومىشۇلىنىڭ ەسىمى بەرىلدى.

اسكەري داستۇردەن اينىماعان مەكتەپ ءوز تاريحىندا 6510 تاربيەلەنۋشىگە باعىت بەرىپ، 38 رەت ءبىتىرۋشى تۇلەكتەرىن ۇلكەن ومىرگە شىعارىپ سالعان. ايتۋلى شاراعا ۇلى جاۋىنگەر باۋىرجان مومىشۇلىنىڭ كەلىنى زەينەپ احمەتوۆا، ەل اعالارى، مەكتەبىن ەسكە الىپ كەلگەن 700 تۇلەك پەن جاس باۋىرجانشىلار جانە مەكتەپ ۇجىمى قاتىستى.

قازاقيلىق ءداستۇردى ۇلىقتاعان زەينەپ احمەتوۆا ەل مۇددەسىن قورعاعان كەڭەس وداعىنىڭ باتىرى باۋىرجان مومىشۇلىنىڭ تاس مۇسىنىنە يىلە سالەم بەرىپ، گۇل شوقتارىن قويدى. مەرەيتويعا جينالعان قوناقتار اق-جاردى تىلەكتەرىن ايتىپ، باتىردىڭ ەسىمىن ۇلىقتاپ، مەكتەپ ۇجىمىنا ساتتىلىك تىلەدى.

سونداي-اق وزگە مەكتەپتەر اراسىندا جوعارى مادەنيەتى مەن ۇزدىك كورسەتكىشتەرمەن كوزگە تۇسكەن وقۋ ورنىنا جاڭا اپپاراتتار مەن بىرنەشە وقۋعا ارنالعان قۇرال-جابدىقتار تارتۋ ەتىلدى. ءبىر ساپتا بوي تۇزەگەن مەكتەپ وقۋشىلارى ساپتىق جاتتىعۋلاردى جاساپ، شارا سوڭىندا تۇلەكتەر ۆالسىندە بيلەدى.

سالتاناتتى اسكەري شارا سوڭى كونتسەرتپەن جالعاستى. اۋەلەگەن ءان دە شىرقالىپ، ۇلاندار مەن مەكتەپتىڭ حورەوگرافيالىق ءانسامبلى ءوز ونەرلەرىن كورسەتتى.

"ادىرنا" ۇلتتىق پورتالى

پىكىرلەر