رەسەي دەپۋتاتى كونستانتين زاتۋلين قازاقستانعا كىرىپ كەتتى

2327
Adyrna.kz Telegram
فوتو: wikipedia
فوتو: wikipedia

رەسەيدىڭ مەملەكەتتىك دۋماسىنىڭ تمد ىستەرى جانە ەۋرازيالىق ينتەگراتسيا جونىندەگى كوميتەتى توراعاسىنىڭ ءبىرىنشى ورىنباسارى، دەپۋتات كونستانتين زاتۋلين قازاقستانعا كىرەردە كەدەرگىگە ۇشىرادى. بۇل تۋرالى rbc.ru جاريالادى،  دەپ حابارلايدى “ادىرنا” ۇلتتىق پورتالى.

اقپارات بويىنشا، كونستانتين ءزاتۋليندى پاسپورتتى تەكسەرۋ پۋنكتىندە باسىندا قازاقستانعا كىرگىزبەي قويعان. قازىر ونىڭ ەلگە كىرگەنى ايتىلادى.

ازداعان قيىندىقتان كەيىن رەسەي سىرتقى ىستەر مينيسترلىگىنىڭ ارالاساۋىمەن ماسەلە شەشىلدى، – دەلىنگەن ماتەريالدا.

كەيبىر مالىمەتكە قاراعاندا، ءزاتۋليننىڭ بايقوڭىرعا كەلگەنى حابارلانعان.

ايتا كەتەيىك، كونستانتين زاتۋلين بۇعان دەيىن قازاقستاننىڭ اۋماقتىق تۇتاستىعىنا كۇمان كەلتىرىپ، ەلىمىزدىڭ سولتۇستىك وبلىستارىن رەسەيگە قايتارۋ جونىندە پىكىر بىلدىرگەن. ول ءتىپتى، بىلتىر ماۋسىم ايىندا پرەزيدەنت قاسىم-جومارت توقاەۆ ەلىمىزدىڭ ۋكراينانىڭ تەرريتورياسىندا قۇرىلعان لحر مەن دحر سەكىلدى كۆازيمەملەكەتتىك قۇرىلىمداردى ەشقاشان مويىندامايتىنىن ايتقاندا، ونىڭ بۇل پىكىرىن سىناپ، قازاقستانعا «ەسكەرتۋ» جاساعان بولاتىن.

قازاقستاندا ورىس حالقى كوپ تۇراتىن بىرنەشە وبلىس بار. ءبىز بارلىق جەردە دوستىق بولسا، رەسەي مەن قازاقستاننىڭ اراسىندا ىنتىماقتاستىق پەن ارىپتەستىك بولا بەرەتىنىن ايتىپ كەلەمىز. ال ەگەر دە... دوستىق بولماسا، وندا قازاقستاندا ۋكرايناداعىداي جاعداي قايتالانادى، – دەگەن ەدى ول.

 

 

پىكىرلەر