Reseıdiń Memlekettik dýmasynyń TMD isteri jáne eýrazııalyq ıntegraııa jónindegi komıteti tóraǵasynyń birinshi orynbasary, depýtat Konstantın Zatýlın Qazaqstanǵa kirerde kedergige ushyrady. Bul týraly rbc.ru jarııalady, dep habarlaıdy “Adyrna” ulttyq portaly.
Aqparat boıynsha, Konstantın Zatýlındi pasportty tekserý pýnktinde basynda Qazaqstanǵa kirgizbeı qoıǵan. Qazir onyń elge kirgeni aıtylady.
Azdaǵan qıyndyqtan keıin Reseı Syrtqy ister mınıstrliginiń aralasaýymen másele sheshildi, – delingen materıalda.
Keıbir málimetke qaraǵanda, Zatýlınniń Baıqońyrǵa kelgeni habarlanǵan.
Aıta keteıik, Konstantın Zatýlın buǵan deıin Qazaqstannyń aýmaqtyq tutastyǵyna kúmán keltirip, elimizdiń soltústik oblystaryn Reseıge qaıtarý jóninde pikir bildirgen. Ol tipti, byltyr maýsym aıynda prezıdent Qasym-Jomart Toqaev elimizdiń Ýkraınanyń terrıtorııasynda qurylǵan LHR men DHR sekildi kvazımemlekettik qurylymdardy eshqashan moıyndamaıtynyn aıtqanda, onyń bul pikirin synap, Qazaqstanǵa «eskertý» jasaǵan bolatyn.
Qazaqstanda orys halqy kóp turatyn birneshe oblys bar. Biz barlyq jerde dostyq bolsa, Reseı men Qazaqstannyń arasynda yntymaqtastyq pen áriptestik bola beretinin aıtyp kelemiz. Al eger de... dostyq bolmasa, onda Qazaqstanda Ýkraınadaǵydaı jaǵdaı qaıtalanady, – degen edi ol.
