جىل سايىن، 15 مامىردا بۇكىل الەم حالىقارالىق وتباسى كۇنىن تويلايدى. اتاۋلى كۇننىڭ ماقساتى – وتباسى مارتەبەسىن كوتەرۋ، قوعام نازارىن وتباسى قۇندىلىقتارىن نىعايتۋعا اۋدارۋ. وسىعان وراي، تاراز قالاسىنداعى ق.رىسقۇلبەكوۆ اتىنداعى ساياباعىندا «وتباسى ايالى الاقان مەكەنى» اتتى ءىس-شارا وتكىزىلدى.
ساياباق اۋماعىندا «اكەم، انام جانە مەن – سپورتتىق وتباسى» اتتى سپورتتىق، «وتباسى – باقىت مەكەنى» اتتى سۋرەت، جاس وتباسىلارعا ارنالعان «Qaz IQ» ينتەللەكتۋالدى ويىندارى ۇيىمداستىرىلىپ، قاتىسۋشىلار ءوزارا كوماندالىق سايىستا ءبىر-بىرىنە دەگەن سۇيىسپەنشىلىك پەن قۇرمەتىن كورسەتتى.
«وتباسى اعاشى» رەسپۋبليكالىق اكتسيا اياسىندا 75 ءتۇپ ياسەن اعاشى وتىرعىزىلدى.
شاراعا وبلىستا قۇرمەتكە بولەنگەن ارداقتى دا بەرەكەلى اۋلەتتەر، ونەگەسى مول وتباسىلار قاتىستى. ولاردىڭ قاتارىندا وتباسىلىق جالپى تاجىريبەسى 200 جىلدان اساتىن دارىگەرلەر ديناستياسى ۋماروۆتار وتباسى، التىنباەۆتار وتباسى, دۇنيەگە 7 قىز اكەلىپ، 26 نەمەرە 6 شوبەرە ءسۇيىپ وتىرعان باقىتتى جانۇيا ماقاشەۆتار وتباسى، ازاماتتىق قورعاۋ ورگانى ديناستياسى اقساقالوۆتار وتباسى, ءۇش بۋىندى ۇستازدار جانۇياسى اريشەۆتار وتباسى جانە وزىنىڭ 7 ۇل-قىزىنان بولەك، قامقورلىعىنا 7 ۇل، 5 قىزدى الىپ، تاربيەلەپ وسىرگەن ەرجانوۆتار وتباسى بار.
"ادىرنا" ۇلتتىق پورتالى
