پرەمەر-مينيستر ءاليحان سمايىلوۆ اسان دارباەۆقا ۇيلەستىرۋ جۇمىستارىن جەتكىلىكسىز جۇرگىزگەنى ءۇشىن سوگىس جاريالادى، دەپ حابارلايدى "ادىرنا" پورتالى.
مەملەكەت باسشىسىنىڭ سايلاۋالدى باعدارلاماسىن ىسكە اسىرۋ جونىندەگى رەسپۋبليكالىق شتاب وتىرىسىندا پرەمەر-مينيستر ءاليحان سمايىلوۆ تابيعي مونوپوليالاردى رەتتەۋ كوميتەتىنىڭ توراعاسىنا سوگىس جاريالادى، سونداي-اق ۇلتتىق ەكوكنوميكا مينيسترلىگىنىڭ باسشىسى الىبەك قۋانتيروۆقا اۋىزشا ەسكەرتۋ جاسادى. بۇل تۋرالى بيلىك ءباسپاسوزى باينادادى.
«ءبىز پرەزيدەنت پەن تۇرعىندار تاراپىنان كورسەتىلەتىن قىزمەتتەردىڭ ساپاسىنا قاتىستى تۇراقتى تۇردە ءادىل سىن ەستيتىنىمىزدى بىلەسىزدەر. الداعى جىلىتۋ ماۋسىمىندا وتكەن قىستا بولعان توتەنشە جاعدايعا جول بەرە المايمىز. سۇرانىس قاتاڭ بولادى، دەدى ءاليحان سمايىلوۆ.
پرەمەر-مينيستر سالانىڭ پروبلەمالارىن ەسكەرە وتىرىپ، پرەزيدەنت ەلىمىزدىڭ بۇكىل تىنىس-تىرشىلىگىن قامتاماسىز ەتۋ جۇيەسىن جاڭعىرتۋعا جانە كۇردەلى جوندەۋگە باعىتتالعان «ينۆەستيتسياعا ايىرباس تاريف» باعدارلاماسىن جۇزەگە اسىرۋدى تاپسىرعانىن اتاپ ءوتتى. دەگەنمەن، ول كوممۋنالدىق قىزمەتتەردىڭ ءتاريفتى رەتتەپ، جاڭعىرتۋ جۇمىستارىن باستاۋ ءۇشىن قاجەتتى قۇجاتتاما باياۋ دايىندالىپ جاتقانىن ايتتى.
"ادىرنا" ۇلتتىق پورتالى
