قازاقستاننىڭ سىرتقى ىستەر مينيسترلىگى قىتايدىڭ چجەتسزيان پروۆينتسياسىندا "ەسىرتكى تاراتتى" دەگەن كۇدىكپەن ۇستالعان قازاق ستۋدەنتىنە بايلانىستى تۇسىنىكتەمە بەردى. مينيسترلىكتىڭ حابارلاۋىنشا، 27 اقپاندا ۇستالعان يۋليا حودەۆاعا بايلانىستى تەرگەۋ امالدارى ءۇش ايعا سوزىلۋى مۇمكىن.
“شانحايداعى باس كونسۋلدىعىمىز ءبىرىنشى كۇننەن باستاپ بۇل ماسەلەنى باقىلاۋعا العان. [يۋليا حودەۆانىڭ] اكەسى م.حودەۆپەن بايلانىس ورناتىلدى. بۇعان قوسا يۋليا حودەۆامەن كونسۋل تەلەفون ارقىلى سويلەستى. دەنساۋلىعى مەن يزولياتورداعى جاعدايعا بايلانىستى شاعىمى جوق” دەلىنگەن سىرتقى ىستەر مينيسترلىگىنىڭ 9 ناۋرىزدا ازاتتىققا جىبەرگەن جاۋابىندا.
ۇستالعان ستۋدەنتتىڭ تۋىستارىنا سىلتەمە جاساعان جەرگىلىكتى “موي گورود”سايتىنىڭ حابارلاۋىنشا، التى جىل بويى بيزنەس جانە مەنەدجمەنت سالاسىندا وقىپ جاتقان يۋليا حودەۆانىڭ ۋنيۆەرسيتەتتى بىتىرۋىنە ەكى اي قالعان. جاقىندارى ونىڭ "ەسىرتكى ساتۋمەن اينالىسقانىنا" سەنبەيدى.
ولاردىڭ ايتۋىنشا، پوليتسيا بىردە-ءبىر "دالەل كورسەتپەي", يۋليانى نەگىزسىز ۇستاپ وتىر. ستۋدەنتتىڭ اتا-اناسى ەندى قىتايعا بارىپ، زاڭگەر جالداماق.
"ازاتتىق" راديوسى
