Qazaqstannyń syrtqy ister mınıstrligi Qytaıdyń Chjezıan provınııasynda "esirtki taratty" degen kúdikpen ustalǵan qazaq stýdentine baılanysty túsinikteme berdi. Mınıstrliktiń habarlaýynsha, 27 aqpanda ustalǵan Iýlııa Hodevaǵa baılanysty tergeý amaldary úsh aıǵa sozylýy múmkin.
“Shanhaıdaǵy bas konsýldyǵymyz birinshi kúnnen bastap bul máseleni baqylaýǵa alǵan. [Iýlııa Hodevanyń] Ákesi M.Hodevpen baılanys ornatyldy. Buǵan qosa Iýlııa Hodevamen konsýl telefon arqyly sóılesti. Densaýlyǵy men ızolıatordaǵy jaǵdaıǵa baılanysty shaǵymy joq” delingen syrtqy ister mınıstrliginiń 9 naýryzda Azattyqqa jibergen jaýabynda.
Ustalǵan stýdenttiń týystaryna silteme jasaǵan jergilikti “Moı gorod”saıtynyń habarlaýynsha, alty jyl boıy bıznes jáne menedjment salasynda oqyp jatqan Iýlııa Hodevanyń ýnıversıtetti bitirýine eki aı qalǵan. Jaqyndary onyń "esirtki satýmen aınalysqanyna" senbeıdi.
Olardyń aıtýynsha, polıııa birde-bir "dálel kórsetpeı", Iýlııany negizsiz ustap otyr. Stýdenttiń ata-anasy endi Qytaıǵa baryp, zańger jaldamaq.
"Azattyq" radıosy
