پرەزيدەنت قاسىم-جومارت توقاەۆ قىتايدىڭ CCTV تەلەارناسىنا سۇقبات بەردى، دەپ حابارلايدى «ادىرنا» ءتىلشىسى.
مەملەكەت باسشىسى اڭگىمەلەسۋ بارىسىندا ەل باسقارۋ فيلوسوفياسىنا توقتالىپ، قازاقستاننىڭ دامۋى مەن گۇلدەنۋىنە بار كۇشىن سالاتىنىن اتاپ ءوتتى.
«مەن ەلىمنىڭ ەۋرازيا قۇرلىعىندا ءجۇرىپ جاتقان ۇدەرىستەردىڭ ورتاسىندا بولعانىن قالايمىن. قازاقستان الەمنىڭ وسى بولىگىندەگى ساۋدا جولدارى مەن حالىقارالىق قاتىناستاردى رەتتەۋدە اسا ماڭىزدى ءرول اتقارادى. قازاقستاننىڭ بولاشاعى جارقىن بولاتىنىنا سەنىمدىمىن. سول سەبەپتى ەلىمدى ەكونوميكاسى دامىعان، وزىق ەلدەردىڭ قاتارىنا قوسۋ ءۇشىن بار كۇش-جىگەرىمدى جۇمسايمىن. قازاقستان وسىنداي سىرتقى ساياسات ۇستانسا، تابىسقا جەتەدى. بەيبىتشىلىكتى جاقتاۋ، بارلىق ەلمەن ءتيىمدى دوستىق قاتىناستا بولۋ ءبىزدىڭ تاريحي تاعدىرىمىزعا جازىلعان. ەڭ الدىمەن، كورشىلەس ەلدەرمەن اراداعى دوستىعىمىزعا باسا ءمان بەرەمىز. بۇل رەتتە قىتاي اسا ماڭىزدى ءرول اتقارادى»،—دەدى ول.
